Vawiina Aizawl Press Club-a thuthar lakhawmtute a kawmnaah he thu hi sawiin Dr. Lalmalsawma Nghaka chuan an party chuan kumina Assembly inthlanpui neih tur boruak inlumlet mek chu ngun taka an thlir thu leh tunah hian Party \henkhat thil tih danah rilru, tisa leh thlarau tichhe thei a awm nia an hriat thu sawiin, hei hi sakhaw rawngbawltute pawhin an ngaihmawh em em leh Central YMA pawhin a ngaihmawh avanga Political party \henkhat a lenchilh hial phah niin sawi a ni. Dr. Lalmalsawma Nghaka chuan, Mizoramah BJP leh MNF an thawk dun tia puhna chu tunhma a\anga tawh sawi a lo awm tawh nia sawiin, hei hi a chhan ber chu hmar chhak-a Congress ni lo party-te thawhhona North East Democratic Alliance (NEDA)-ah MNF chu a tel vang a ni tih a sawi a. Internet hmanga chanchinthar thehdarhtu, www.tripurainfo.com chuan tun thla ni 23 khan BJP leh MNF chuan inzawmna an nei a ni tih a tarlang a, hetah hian Mizorama BJP tana campaign mek, Tripura-a BJP General Secretary, Pu Pratima Bhowmik chuan Mizoram inthlan zawhah sawrkar siam turin BJP leh MNF an thawk ho dawn tih a sawi niin tarlan a ni tih Dr. Lalmalsawma Nghaka chuan a sawi a ni.
Congress Party-in MNF leh BJP thawk duna an puh mek laia Chakma Autonomous District Council-a Congress-in BJP a thawhpui leh si chungchang zawhna chhangin Dr. Lalmalsawma Nghaka chuan, kha inremna kha CADC Area-a tualchhung inremna satliah a nih thu leh CADC-a BJP MDC-te chu Congress a lo awm tawh \hin, an party-a an luh leh mai beiseite an nih tih sawiin, an tum anga thil a kal tak loh avangin an thawh dunna pawh tun hnai khan an Party chuan an tihtawp leh thu a sawi a ni.
