Coronavirus, COVID-19 leh Mizoram chungchanga Chief Minister thusawi

0
234
views

He thuziak hi Chief Minister Facebook Page atanga lak a ni.

Mizoram mipui duhtak te u.

Kan ruahman ngai loh leh kan remruatnaa tel ngai reng reng lo mihring tana hri hlauhawm tak Coronavirus, Covid-19 chuan khawvel ram hrang hrang mai ni lo, Mizoram pawh min rawn luhchilh ta a ni a. Pathian thuin khawvelah hetiang hun hi a thlen tur thu a sawi a dik zia a takin kan hmu ni te pawhin a lang.

Ani kan Pathian chuan, _*“Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u.”*_ tiin Philippi 4:6-7 ah duhsak takin a sawi a. Khawvel siamtu leh neitu Amah ngei chuan engahmah mangang lo tur leh lawmthu sawi a, engkimah ṭawngṭaia dilin, kan duhna te a hnenah thlen tur leh amahin engkim min tihsak vek min tiam a ni.

Kan beisei loh takin he natna tuar nia ngaih kan lo awm ta hi a pawi kan ti em em ṭheuh a. Amaherawh chu, mipuite chiai lo leh thlabar lo turin ka ngen duh che u a ni. He natna tuarte leh an chhungte tana hmuh nuam lo thu leh thlalak te Social Media lama tihdarh vak vak hi he Hri laka kan himna hmanrua a ni lova, midang awmze nei si lova thlabara siamna mai a ni a, Pathian tihdamna an chunga a thlen theihna turin i dilpui zawk ang u.

Khawvel ram hausa leh changkang te anga hmalak leh duh ang ang hmanrua nei kan ni lova. Amah erawh chu theihtawpin ram mipuite himna leh an harsatna sutkianna turin sawrkar hi a ṭang a ni tih hi kan hriat ka duh a.

Mizoram chhunga Kohhran zawng zawngten kohhran mipui himna tura Kohhran hun hman mek ruahmanna an duan te fel fai taka chawlh lailawk an lo ruahman te hi Pathianin Mizote min hruai bik zia a langin ka hria.

Mizoram leh Central sawrkarin pawhin mipuite himna atan pawn chhuak lova mahni in lama in kharkhip tura ruahmanna a siam hi zawm ṭheuh ila.

He hun harsa takah hian kan dinhmun a inchen lo hle tih kan hria. Ei leh in emaw, nitin khawsakna kawngah harsatna tawk thei vek kan ni. Labour, Employment, Skill Development and Entrepreneurship Department hnuaia Labour Cess sum hmangin Ei leh bar kan tlakchham lohna turin April thla quota ration sem tur pawh March thla tawpah sem tura ruahman a ni a. AAY leh Priority Household card (ration card eng leh pawl) neihote tan ration a thlawna sem tur a ni. APL (Ration card var) zingah pawh harsa tak tak an awm tih sawrkarin a hria a, hengte tan pawh ruahmanna siam a ni ang.

Mualpho leh zaha la lovin tualchhung leh biala thuneitu, mipuite aiawha ding, kan nu leh pa atana kan thlan an nih hriain inthlahrung hauh lovin Local Task Force te hnenah emaw, LC, VC leh YMA te hnenah inhriattir zel ila, Sem sem dam dam ei bil thi thi, thih leh ruam khatah, dam.leh tlâng khatah, ti hnam kan nih hre reng ila, sawrkar hi in ta a ni a, in tan a zawng zawngin aṭang zel ang.

COVID-19 vanga mipui nitin mamawh essential commodities khaihlak lova kan hmuh theihna turin sawrkarin ruahmanna a siam a, Mahni mamawh aia tam lei khawl chiama midang tana harsatna siam lo tur leh man pangngai aia toa engmah hralh lo tur te in ka ngen che u a ni.

Mizoram pawn lama pawimawh chi hrang hrang ti a awm, lo haw tum leh haw duh, in kal pawhna khar a nih tak avanga harsatna tawk leh Mizoram lo luh hnua harsatna tawkte pawh kan awm tih kan hria. Mangang lo turin ka ngen duh che u a. Theihtawpin in tan kan tang zel dawn a, sawrkarin a ngaihven zel dawn che u tih lo hria ula ka duh a ni.

Tin, mipuite tana hnathawktu Mizoram sawrkara thawktute zawng zawng pawh a ṭul ang zela mipuite harsatna thleng thei leh an harsatna tawh te sutkian sak turin eng hunah pawh rilru fim leh tlawmngai taka ngaihvena, mipuiten thlamuantu leh an harsatna sutkian saktu tur kan nih hriaa, dawhtheih taka thawk zel turin ka ngen bawk che u a ni.

A bik takin kan himna atana thawktu, Roreltute, health department leh department zawng zawnga thawktu a hniam ber atanga a sang ber thlengin, ram mipuite himna atana an theihna zawng zawng hmangtute tan hriselna, finna leh remhriatna bakah kan mamawh dangte nen Pathian hnenah tihtakzetin i dilpui zel ang u.

He hun hi mahni mimal leh pawl hmingthatna atana hman hun a ni loa, vuivaina hun leh midang beihna hun a ni lo tih hriain, kan ram leh hnam damna tura kan thawhho hun a ni tih i hre thar leh ang u.

Mipuiin he hri do letna turin tihtheih kan nei tam lo hle a, kan tihtheih zinga pawimawh em em chu kan himna tura thuneituten ruahmanna an siam te a tak kan zawm a, mahni inah dawhtheih taka tawmim hi kan duty pawimawh tak a ni tih i hria ang u.

Kan Pathian chuan, Isaia 41:10-ah, “Hlau suh u, kei in hnênah ka awm si a; mangang suh u, kei in Pathian ka ni si a: ka tichak ang che u a; a ni, ka ṭanpui ang che u; a ni, ka felna kut ding lamin ka chelh reng ang che u.” tiin min tiam a ni.

Sawrkar, Kohhran, Tlawmngai pawl leh mipui ṭanhona zarah he hunkhirh tak hi Pathian venna leh chakna, a thiltihtheihna avangin kan paltlang ngei i beisei ang u.