Disaster Recovery Insitute International in an zirchianna atanga an hmuh danin, hri leng a zawh hnuah pawh thil awmdan inthlakthleng a tam dawn avangin sumdawnna hmun tam tak chu an in khar hlen dawn a, a bikin sumdawnna tenaute chu a tuar nasa tur an ni. DRI chuan sumdawnna reng reng khar a awlsam ang aiin hawn leh erawh a harsa hle tih a sawi a, DRI Chief Executive Chloe Demrovsky chuan hri leng a reh hnuah pawh mipuiten an khawsak phung an thlak tawh dawn avang leh an sum hman dan an tih danglam tawh dawn avangin sumdawnna tenauten nasa takin an tuar dawn a ni a ti.
Mipui kharkhip chhungin, mipuiten an mamawhte online hmangin an lam khawm nasa a, company te pawhin meeting ang chi te online-a an buatsaih bakah zirna thlengin online hmanga kalpui a ni a, heng thilte hi mipui kharkhip tawp rualin a tawp mai dawn lo a, company tam takin an kalphung an herrem a tul dawn a ni.
