Defence Minister Nirmala Sitharaman-i’n Jammu tlawh

0
429
views

Jammu & Kashmir Sunjuwan Sipai Camp-a lut ru, mifirfiakte sipaiten an beih let mek laiin Defence Minister Nirmala Sitharaman chuan vawiin khan Jammu a tlawh. Defence Minister hian he inbeihna-a sipai hliam tuar leh civil mi hliam tuar, Satwari Army Hospital-a enkawl mekte a tlawh ang a, ram tana nun hlantu Martyr chhungte pawh a kawm bawk ang. Sunjuwan-a mifirfiakte chet dan kimchang hi Sitharaman hian a enfiah dawn a ni. Army Chief General Bipin Rawat pawhin Jammu hi a tlawh a, nimin lam khan a let leh tawh thung. Vawiin a ni thum ni thleng khan Sunjuwan Sipai Camp luhchilhtu, mifirfiakte beihlet hna hi sipai ten an la chhunzawm zel a, darkar 50 chuang ral hnuah sipaite chuan mifirfiak 4 an kaphlum tawh a, mifirfiakte hian sipai 5 leh civil mi pakhat an kaphlum a ni. Sipai Camp hi Inrinni zing lam dar 4:45 vel khan mifirfiak pawl Jaish-e-Muhammad mi leh sa te hian an luh chilh a, hmeichhia 6 leh naupang pakhat tiamin mi 11 zetin hliam an tuar a ni. Mifirfiakte hian JCO quarters pahnih luh chilhin Granade an ti puak a, silaiin an pawng kah chiam bawk a ni. Mifirfiakte beihlet hna hi zawhfel a la ni lo a, Sipai Camp pumpui hi a him tawk tih finfiah a nih hunah inbeihna hi tihtawp a ni ang tih Defence Ministry lam chuan an sawi.