Inthlanna hi bial 70 ah neih a ni dawn a, tuna sorkar dinglai Arvind Kejriwal-a kaihhruai AAP sorkar term hi February ni 22-a tawp tawh tur a nih avangin inthlanna hi February ni 8 ah neih turin Election Commission chuan vawiin tlai khan a puang a ni.
Inthlanna neih a nih tur thu hriattirna chu January ni 14 ah tih chhuah a ni ang a, chuh tumte tan January ni 21 thleng hming pek luh theih a ni ang a, inhnukdawk leh duhte tan January ni 24 thleng hun hawn a ni ang a, February ni 8 ah mipuiten vote thlakin february ni 11 ah vote tla te chu chhiar a ni ang.
Delhi Assembly inthlannaah hian vote nei mi vaibelchhe 1 leh nuai 46 an awm a, an zinga nuai 80 sing 5 sang 5 chu mipa an ni a, hmeichhe vote nei nuai 66 sing 3 sang 5 an awm bawk.
Nikum kumtir lama Lok Sabha inthlanah khan BJP chuan Delhi-a Lok Sabha seat 7 an hui vek a, tun hi Lok Sabha inthlan hnua inthlanpui neih leh hmasak ber tur a ni.
Rorellai AAP, BJP leh Congress te chu inbei ber tura ngaih an ni a, Delhi boruak bawlhhlawh lutuk chungchang chu campaign-a thu inchuh tur langsar zinga mi a ni.
Kum 2015 Assembly inthlanah khan Delhi ah hian AAP chuan seat 67 zet an la a, BJP in seat 3 la in Congress chuan seat an la zo lo a ni.
