Delhi Chief Minister, Arvind Kejriwal leh a thuihruai-te’n Delhi LG hmuh tumin an la nghak chhunzawm zel

0
336
views

Delhi Chief Minister, Arvind Kejriwal leh a \huihruai-te’n Delhi LG hmuh tumin an la nghak chhunzawm zel. Kejriwal chuan Twitter-ah Delhi LG hi hmuh tumin ni riat an nghah tawh thu leh Delhi mipui-te tana minute riat pawh a seng thei lo chu hriatthiam harsa a tih thu te leh a rang lama an inhmuh ngei theih a beisei thu a sawi a ni. Puan tawh angin Kejriwal leh a Cabinet \henkhat chuan Delhi LG, Anil Baijal an hmuh theih loh vangin, a chenna in tuala waiting-room-ah lungawilohna lantirin an pungkhawm a, helai hmunah hian sit-in protest an nei chhunzawm nghal a ni. Thawh\anni lam khan Delhi High Court chuan Kejriwal leh a \huihruaite chet dan chu dan kalh a nih thu leh ram danpuiin midang chenna in emaw pisa emawa punkhawma lungawilohna lantir a remti lo niin a lo sawi tawh a, hemi chungchangah hian Supreme Court-ah pawh hmanhmawh taka ngaihtuah tura ngenna thehluh a ni a, mahse court thuneihna sang ber chuan a hnawl rih a, nipui chawlh vanga SC khar lailawk a nih vangin, Vacation Bench chuan Court hawn a nih leh huna ngaihtuah chauh turin a lo ti thung a ni.

Kejriwal hi sorkar laipuia eptu pawl tam zawkin an thlawp thu an sawi tawh a, BJP thawhpui hlui leh Andhra Pradesh CM Chandrababu Naidu bakah, West Bengal CM Mamata Banerjee leh Karnataka CM HD Kumaraswamy te pawhin Kejriwal hi an thlawp thu an sawi ve bawk a, Kejriwal chuan Delhi sorkar-a IAS nuar mek te’n an nawrh titawp tura Delhi LG-in ngenna a chhuah hma loh chuan, LG chenna in hi chhuah san an tum loh thu a sawi bawk a ni.

Delhi buaina hi kumin February thla a\anga in\an tawh kha a ni a, Delhi Chief Secretary, Anshu Prakash-a chu zan rei tawh lamah, CM inah koh a ni a, an inhnial buai deuh avangin MLA \henkhatin kut an thlak hial nia a sawi avangin, AAP MLA leh midang \henkhat lakah thubuai ziah a ni a, AAP chuan thil thleng nia sawi hi an pha thung a, hemi hnuah hian IAS officer-te hian thla li vel chu sorkar meeting-ah te an tel duh loh bakah Minister-te thurawn pawh an zawm ngai lo niin Kejriwal hian a sawi ve bawk a, he puhna hi Delhi IAS Association-te chuan an pha ve leh bawk a ni.