DIG Northern and Southern Range huam chhunga pawikhawihna thlen dan thlirlet

0
506
views

DIG Northern and Southern Range huam chhunga pawikhawihna thlen dan thlirletna, Annual Crime Review Meeting chu vawiin khan Aizawl SP Conference Hall-ah neih a ni a. A hmanpuitu DIG Northern and Southern Range, Pu Joseph Lalchhuana chuan thu sawiin, Mizoram chu ruihhlo tawlhrukna kawng a nih thu leh dan leh thupek kengkawhtuten theihtawp chhuaha tan an la chhungin tihrem a harsa hle ni a sawiin, hemi kawnga hmalatu dang YMA leh VDP-te nena thawh hona tha neih a pawimawh thu leh District tin SP-te chu an huam chhung theuhah tha thlah lova tan la turin a chah a ni. Pu Joseph Lalchhuana chuan, ram a changkan zel rualin sualna pawh a pung chho ve zel tih niin a sawi a, Mihring hmanga sumdawnna hial tiduh an awm tak avangin hemi kawnga inzirtirna uar a tul thu a sawi bawk. Kumina kum bul a intan chauh laia kangmei vanga chhiatna leh in leh lo chan engemawzat an awm chu pawi a tih thu leh heng chhiatna hrang hrang thleng hi vanduai vang piah lamah fimkhur tawk loh vanga thleng palh thei a nih ve bawk avangin fimkhur tura uar zawka inzirtir a ngai niin DIG chuan a sawi. He thutkhawmnaah hian kum 2016-17 January atanga December thla thleng leh kum 2017 leh kumin January thlenga pawikhawihna hrang hrang thlen dan an thlir hova, Report atanga a lan danin, kum 2016 chhung khan Mizoram pumah thubuai 2,837 ziah luh a ni a, nikum chhung khan thubuai 2,707 ziah luh niin, nikum hmasa aia nikum chhunga thubuai ziahluh chu 130-in a tlem zawk a, kumin bikah chuan January thla thleng khan thubuai 202 ziahluh tawh niin, hei hi nikum January thlaa thubuai ziah luh 189 aiin 13-in a tam zawk a ni. Crime Review Meeting-ah hian District tin SP, Traffic SP, Armed Police Commandant leh Officer dangte an tel a, naktukah chhunzawm leh a ni ang.