District Hqrs. khawpui dang ang bawkin Mamitah hian kumthar zan khan halpuah ri hriat tur a awm a ni. Mamit District Hqrs.-ah hian vawiin kum 2019-a sorkar pisa hawn ni hmasa ber khan DC Office leh Office dangte chu hawn a ni a, amaherawhchu pisa kai an tlem bakah anmahni dawrtu pawh an tlem niin Mamita kan reporter chuan a sawi a ni.
Kolasib-ah pawh boruak \ha leh muanawm tak hnuaia kumthar hman zawh a nih hnuah vawiin khan sorkar pisa zawng zawng hawn leh a ni a, pisa kai leh dawrtu erawh chu District dang ang bawkin an tlem a ni.
Champhai District-a Vaphai khuaah chuan nizan dar 9:45 vel khan Pu Kapchhunga chenna in a kang a, a kan ral hma hretin mi tlawmngai tlan khawmten an \helh mit thei a ni. He in kan chhan hi hriatchian ni lo mah se electric kal sual nia rin a ni a, vawiin khan Vaphai khua hian mitthi an neih avangin in kang ruhrel khawm leh senghawi hna chu naktukah VC leh YMA ruahman angin thawh a ni ang. Champhai khawpui leh District chhung hmun dangah hian kumhlui thlah zan leh kumthar lawmna kaihhnawihah buaina leh lirtheia chetsualna thleng a awm lo a ni.
Serchhip District-ah pawh boruak \ha leh muanawm tak hnuaiah kumhlui thlah a, kumthar lawm a ni a, vawiin khan sorkar pisa te chu hawn leh a ni. Hetiang bawk hian Lunglei District-ah pawh mipuiten kumthar boruak \ha leh muanawm tak hnuaia an lawm hnuah vawiin khan sorkar pisa hawn leh a ni a, pisa kai leh anmahni dawrtute erawh chu nidang angin an la tam lo a ni.
Lungleia kan reporter sawi danin kumhlui thlah leh kumthar lawm laiin zu khap vangin nikum lam aiin boruak a \ha-in a ralmuang a, lirthei leh thildanga chetsualna thleng a tlem bakah zu rui man an tlem bawk a ni.
Lawngtlai District Hqrs. leh Siaha District Hqrs.-ah pawh sorkar pisa hawn a ni a, amaherawhchu, Autonomous District Council Pisa te erawh chu hawn a la ni rih lo a ni.
