ICFAI University zirlaite hi vawiin chawhma dar 10 khan an Campus tualah pungkhawmin an University enkawltu, Hyderabad-a ICFAI Society-in Mizoram sorkar hnena a intiam anga ICFAI University, Mizoram kalpui a nih loh avangin lungawi lohna an lantir a, thawktute pisa kai tur hi an dang a ni. ICFAI University Mizoram hi kum 2006 a Mizoram Legislative Assembly-in ‘The Chartered Financial Analysts of India University Mizoram Act 2006’ a pass behchhanin Mizorama Private University hmasa ber leh awm chhun niin din a ni. Students’ Action Committee hruaitute chuan, an University din phalna petu Mizoram sorkar-in a beisei ang lo taka harsatna tam tak an lo tawk tawh niin an sawi, an harsatna chu an au chhuahpui loh chuan awp beh leh an phu tawk enkawlna dawng lova, an mahni enkawltu Hyderabad-a ICFAI Society-in zirna hmasawnna aia sumdawn nan chauha zirlaite an hman zel an hlauthawng tih sawiin, an mahni enkawltu ICFAI Society hnena kum tin fee tam tak an pek \hin avangin an phu tawk enkawlna an dawn theih nan lungawi lohna hi an lantir ta tih an sawi. Tuna an thil phut hrang hrang chu zirlaite chanpual dik tak nia sawiin, an ham\hatna leh an chanvo tur dik tak an hmuh hma chu nawr chhunzawm zel an tum thu an sawi.
ICFAI University zirlaiten lungawi lohna an lantir chungchang hi hriat a nih ve leh Higher and Technical Education Joint Director, Pu Ramhmangaiha Ralte-in a hmunah tlawhin University hotute leh zirlai hruaitute nen thil awm dan an sawi ho nghal a. Hetah hian zirlaite harsatna hrang hrang chu ICFAI Society-in an tih tur an tih tawk loh vang a nih thu zirlaite chuan an sawi a. Pu Ramhmangaiha Ralte chuan, zirlaite harsatna chu lo zir chian a, a \ul anga bawhzui nghal a nih tur thu a sawi a, a ngen angin Students’ Action Committee chuan Mizoram Sorkar leh ICFAI University Vice Chancellor hmalakna chu April ni 2 chawhma dar 11:30 thleng ngaichan an remti a ni. ICFAI University Mizoramah hian zirlai 675 awm mekin, Department 12-ah Course hrang hrang 17 zir theihna a awm a. Chung zinga 10 chu Post Graduate zirna niin, a bakah 7 chu Under Graduate Course a ni.
Students’ Action Committee Chairman, Lalnunpuia chuan, lungawi lohna an lantir chhan chu an chanvo an hmuh loh vang a ni tih Zonet a hrilh.
