Zir honaah hian District hrang hranga Returning Officer, Assistant Returning Officer, Election Officer leh District Level Master Trainer te an tel a, a hmanpuitu Chief Electoral Officer, Pu Ashish Kundra chuan, Mizoram chu vote thlak nawn awm ngaih lohna hmun a nih avang te, EVM leh VVPAT chhia tlemna a nih avangin ram pum tan entawn tlak a ni, a ti a. Hetiang bawk hian vote chhiar ni-ah pawh tihsual awm lo tura inpuahchah turin District tina inthlan kaihhnawih buaipuitute chu a chah a ni. Pu Ashish Kundra chuan, District hrang hrang hotute chu tun thla ni 17 hmaa vote chhiarna hmun tur, Counting Hall peih fel a, endik theih tura hmala turin a hrilh a ni.
Training-ah hian Addl. CEO Pu Krishna Mohan Uppu, Jt.CEO, Pu H.Lianzela, Deputy CEO Pu CC. Lalchhuangkima, Asst. CEO Pu Malsawmzuala leh Election Department-a Programmer, Pi H. Vanlalruatfeli ten zirtirna an pe a ni.
Mizorama Lok Sabha member thlanna neih ruala Aizawl West I Bye Election-a vote tlate hi ram chhung hmun dang rualin tun thla ni 23 khian chhiar a ni dawn a, Lok Sabha bikah chuan District hrang hranga Counting Hall 40-ah vote tlate hi chhiar tur a ni.
