Fakselna 15th February, 2018

0
605
views

Aibawk leh S. Sabual inkar PMGSY kawng hi tun thal chhung hian min siam that sak ve ula kan va duh ve. Tuna min siamsak dan hi chu thal daih chauh a nih hmel riau mai. A khuar lei tak hnawh leh nawr rual ngawt hi chuan ruah a sur ang a, kan tang leh dawn thovin a lang tlat a ni. Heti lo deuh hian min han ngaihtuahsak teh u. Kan pu Robiaka pawh hian vote a la duh chuan han bengchheng ve sela.
Sumo Driver
————–

Mizoram chhunga lei dawh chim ta fo mai hi eng dang mawhchhiat lovang u. Lei dawhtu zinga a hotu leh sum khawihtu mawh a ni e. Hetiang thir lei reng reng chu a laia dotu ban a awm ve loh avangin a sir ve vea a tan chhan tih ngheh em em ngai a ni a. Hetianga tihngheh leh rinawm tawka siam ngai a ni tih chu kan Engineer hote hian an hrechiang lutuk. Thil pawi tak leh ngeiawm ber mai chu lei nghet tawk tura a siamna tur pawisa hmang zo phal lova lei an dawh thin vang a ni zawk e. Tuna Tuirini lei dawh pawh hi han chim lo ziazang a ni hleinem, cheng vaibelchhe li tling tep hman ralna ni hek lo! He lei dawha mawh latu hi mipuiin umzui ila, sorkar dem dem lo hian. Sorkar kan tih fo ai hian dan lo dan hman a ngaih ve chang pawh hi a awm e. PH FANAI
————–

Tuirini lei chim avang khan hengte hi an man tawh em le (i) Work Supervisor (ii) Accountant (iii) Contractor (iv) Estimate siamtu leh Designer? Man tur an ni dawn lo’m ni?
Vena Pu
—————

Lal Thanhawla te unau hi Mizoramah hian an duh ang thalin an tal vel a ni ber hi. Thil pawi tak a thlen paw’n a ngawi hmak zel a. Awihawm deuh hian a tawng chuar chuar a, an nikhua lo em mai, bang nghal hmak rawh se. An unau hian an lo nikhua lo a nih hi.
No. thup
————–

Tun inthlana Congress leh MNF i la vote talh a nih chuan Mizorama cheng ve tlak i ni lovang. Kan harh a hun ta takzet e.
Lawma Pa
————–

Lei dawh chim chungchangah hian State dang zawng ni se ihe lovin a changtu Minister a bang ang a, a enkawltu engemawzat an hna atanga chawlh tir an ni ngei tur?
RODY PA
—————-

Ngun taka Fakselna, Zing Daifim, News chhiar leh Korean leh Hindi film Mizo tawnga an lehlin lo ena lo ngaihthlak hian Mizo tawng dik tawk lova lam/chhiar hi a va tam em.
Hmannia ZONET-a kan mithiamten kan tawng boral hlauhawm chungchang an rawn sawi ka ngaihthlak atang phei kha chuan ka lo ngaimawh lehzuala. Kan tawnga thluk dik lova lam leh chhiarte entirnan, ‘Thisen pek runpui’ te kha ‘run’ hi ‘tah sawn pa pakhat a thu run mai’ tiha run thluk hi a rawn hmang a, hetiang thiltih hming sawifiahna (adverb, adjective) te hi lam sual ka lo hre hnem thin. Tin, khaw hming lam dik loh hi a tam thei thin bawk. Double adverb ho pawh lam dik loh hi a va tam thin em! Film lamah lah ni se hmeichhia chauhin an neih mipate paw’n “vah” te kan nei ta nawk nawk mai. Hei chu pawi em em pawn a lang lem lo mai thei e. Mipui tam ber ten kan en leh ngaihthlak kan Cable channel pahnih chauhte hi chuan tan han la leh zual ula, tawng humhalh lamah hian inthawh hlawk dawn hian ka ring em a ni.
Tea, Aizawl
————–

Sakhua-ah chuan mi a lo sualin Puithiam/Pastor mawhphurtu-ah kan puh lova, sorkarah chuan miin thil tha lo a tihin a changtu Minister kan puh ang lawi a. Mihring hi mak taka siam zawng kan ni ngei e.
The Communist
—————

Tuirini lei chim ka ngaihtuah nasat poh leh mak ka tih a zual. Engineer-te hna ve lem si za zela 90 zawh tawh an ti lehnghal emaw ni? Pa pahnih dawl lo kha khawvel thil mak zingah ka telh ve a ni. A bul hnai khua Khawruhlian leh Sesawng pa ho pawh khian an thiam dan danin khitiang hmang khian dawh ta se tun ang hi a thlen ka ring lo. Lawks Valentines Day puala thisen pete ka fak ngawih ngawih, Pathianin vengin malsawm mawlh che u rawh se.
Duata pu
—————

MRB Siaha Vengpui Branch-a update khawl hi a chhia an ti reng mai, a va ninawm em em ve. Vengpui Branch dawr thintute kan buai tawh a nih hi. AIZAWL lam hotute khan update khawl thar lo pe ve tawh teh u. Siaha mipui kan lawm hle ang.
On-a pa, Siaha
—————

Khawvel mawina leh Kristianna hi a inkalh tlat a, kal kawp thei a ni lo! Bible paw’n, “He khawvel dan ang hian awm suh ula…” tiin a sawi si a. Tin, khawvelin Miss Universe a thlan vang maiin Miss Mizoram thlan tum ve ngawta Lalpa mit tikham zawnga mahni thlalak te, hnute leh eng engemaw ni lang khawpa thlalak te! Khawvel chhiat tawh zia hi! Lar duh vang maia mahni inzuar tlukah ka ngai! Hrem hmunah meialh hluah hluah karah tuna he khawvela kan in pose sexy kual vel hi kan la hrechhuak awm si a! A nuam teu teu ang chu. Lalsavunga park-a photo shooting an neih dawna thla la kuala, tawng zuah zuah nu pawh kha a mit atangin hremhmun ka hmu thei tlat a ni. Ka thu sawi hi a atthlak inti ang. Amaherawhchu, thudik a ni miau si a ni. Lalpa lamlianah he khawvel dan anga awm ho hi an leng ve lo!
The Prophet of God
—————

Mahni party hmangaihna hi a lian hle a ni ang. Thawk ho party ZPM party pahnih, ZNP leh MPC-te pawh hian office hran neiin an party hming an la sawi ri tam zawk. ZPM chu an sawi ri ve zeuh chauh a ni. Rinhlelhawm hlawm.
VK Ruata
—————

Tuirini lei siam lai chhia chu a pawi hle mai. Hemi avanga vanduai, nunna hial chan phah an awm chu pawi lehzual tak a ni. Pu Fakzuala hi lainatawm kan ti theuh ngei ang. Chutih laiin tute mahin tha ka tih loh thil duhawm lo a lo thlena a changtu Minister bang tura han duh nghal maina rilru hi a va Kristian rilru lo em!! Damdawi Inah leh in lamah pawh mitthi kan nei chamchi mai a, Health lam changtu Minister kan mawhpuh zel dawn em ni ang? Lei chim hi a tih tir a ni lova, ama vil a ni hek lo. Chutiang bawkin mi an lo thih hian pawi pawh a ti ve ngeiin ka ring. A hming chher nan he lei chim ta pawh hi tha taka siam ni se a duh ve ngei a rinawm laia a changtu Minister, a hming lam ri meuha “Bang rawh se” han tihte hi a va zahthlak em!! A boruak a hniam em mai ching tawh lo ang u. Ruahpui tam bik, nikum anga a sur leh hunah PHE Minister te pawh bang tura induh zel ka hlau hlel love.
Amos-a pu, Kulikawn
————–

Enga tinge kan ram roreltute hian “SEM POLICY” hi an uar tak em em mai le aw! Sem policy hi tawk tarhah an hmang a nih ber hi maw! New Zealand-ah chuan kum 1980-85 velah khan an GDP a thang nasa hle a, hma an sawn lehzualna tura ngaiin mi retheite hnenah a thlawnin pawisa an sem ta chiam mai a. Mihring rilru nasa taka tichhiain dawngdah phah nan an hmang nasa ta mai a. An economy chuan thatpui a hnekin nasa takin a chhiatpui ta zawk a, an sim chiang hle. Ram changkang zawk leh mihring puitling zawkte pawhin an lo tlukpui thin chu “Sem policy” hi a ni a ti mauh mai si a, mi ramte chuan a nawlpuiin hmangaih leh duhsak takin an enkawlin, retheihna a ta umbo tumin tan an la nasa mai. keini Ram hruaituteah chuan anni chu Congress an ni lo, anni chu MNF an ni lo tia mahni party huang chhunga awm te chauh sorkarna chiah siam a la ni hi a khamawm tak zet zet a ni. I tangrual ang u.
Aizawl pa
—————

Kan rama lei dawh lai chim fo mai hi nunna chan an awm emaw awm lo emaw a mawhphurtute hian an phu tawk hremna tuar hi an phu chiang a ni. Lei dawh emaw, lamlian siam emawah hian a changtu Minister te, Engineer te, SA te an awm ngei anga, labour pawh an awm ang. A technical lai zawng zawng hi mi ramte angin labour mai ni lovin Engineer te hian thu mai ni lovin a takin an thawk tur a ni ve lo’m ni? Nge chung lam atangin thiam thu sawiin kan inhumhim leh dawn zawk? Lei dawl zawh loh khawpa RIT mihringin a zawh chim tiin kan puhmawh leh hlauh zawk dawn em? Hliam tuartu kha a inenkawlna senso mai bakah hliam a tuar avanga hna a thawh theih loh hun chhunga a thawh chhuah tur zat ang pawh pek tel ni se a va tha ve.
Puipuii pi
————–