FBI ten an thuneihna hmang suala Trump-a adviser an chhui nia sawi chungchanga Democratic Party Memorandum tlangzarh remti

0
364
views

US President thlan dawna FBI ten an thuneihna hmang suala Trump-a adviser an chhui nia sawi thubuai kal zelah Democratic lamin Memorandum an siam chu Congressional Panel chuan tlangzarh a remti. Us President Donald Trump-a chuan ni 5 chhungin he lehkhapawimawh phek 10-a chhah hi tlangzarh tur a nih leh nih loh a tih chian a tul dawn a ni. Hemi hmalama Republican lam te memorandum tih chhuah chuan FBI te chu an thuneihna dik lo taka hmanga Trump-a adviser chhuiah a puh a. Hemi chhanletna hi Democratic lam chuan an buatsaih ve leh a ni. Puan tawh thin angin Campaign lai khan Trump-a tana Foreign Policy Adviser Carter Page-a chu FBI te hian an thuneihna hmang sualin an chhui ru reng niin Republican lam hian an sawi a, FBI leh Justice Dept. te chuan thu belhchian dawl lo tlawh chhanin Page-a leh midang inbiakna lo ngaihthlak ruk phalna Court atanga laah an puh a ni. Hetiang boruak karah hian Democratic lamin Republican lam thil sawi chhanna, memorandum an siam hian nizan khan President hnen a thleng a, President chuan memorandum hi tlangzarh tur leh tur loh thuah Zirtawpni ral hmaa thutlukna a siam a tul dawn a ni. Democratic Senate Leader Chuck Schumer chuan President hi lehkha thawnin, Democratic te memorandum tlangzarh ve ngei chu lai taka thlirin thil tih dan tur a ni a ti a, Republican lam thil sawi chu tuna Justice Department ten an chhui mek, President thlan dawna Russia inrawlh leh rawlh loh chhuina tih bahlah tumna a ni lo tih a taka lantir turin a phut bawk.