Florida School zirlai 17 kaphlumtu Nikolas Cruz-a pawi a’n khawih thei ang tih hre lawk chungin FBI-in veng thei lo

US Florida High School pakhata zirlai 17 zet, nilaini-a Nikolas Cruz a’n a kahhlum thu kal zelah Nikolas Cruz hian hetiang pawi hi a khawih thei ang tih hriattir lawk an ni chunga an ven theih loh avangin FBI laka lungawi lohna a lian hle. Florida Governor Rick Scott chuan FBI Director hi a ban a phut a, Attorney General Jeff Sessions chuan he thil chhui chiang tur hian thupek siam nghalin FBI te hlawhchhamna chu pawi a tih thu a sawi a. Mitthi chhungte pawhin FBI laka an lungawi lohna hi an sawi chhuak hlawm bawk. President Donald Trump chuan nimin khan Parkland tlawhin inkahna-a damkhaw chhuakte a kawm a ni. Trump-a leh a nupui Melania Trump te hian hliam tuarte enkawlna damdawiin an tlawh hnuah pawikhawihna thlenna hmuna sheriff office pawh an tlawh a, an hmalak danah lawmthu an hrilh a ni. Zirlai 17 kaphlumtu Nikolas Cruz hi kum 19 mi a ni a, Parkland-a Marjory Stoneman Duglas High School-a zirlai pawng kah chiamtu a nih thu hi Police te hmaah a puang tawh a, tualthah thubuai chi hrang hrang 17 zet awrhtir a ni. Cruz-a hian hetiang pawi rapthlak hi a khawih thei ang tih nikum lam khan youtube video pakhat-a comment a siam atangin rinhlelh a lo ni tawh a, hei hi FBI te pawh hriattir nghal a ni a, FBI hian pawikhawihna thleng tur veng tur hian an tih tur an hlen chhuak lo tih an pawm thu an puan hnuah FBI sawiselna hi a nasa zual a ni. January ni 5 pawh khan pawikhawihtu Cruz-a hmelhriat hnai pakhat chuan FBI te hi be pawpin, Cruz-a’n silai a neih dan leh pawikhawih nana a hman mai theih thu hi a lo hriattir tawh a ni. FBI director Christophe Wray chuan thil thlen dan dik tak an la chhui chiang chho mek tih a sawi a, a bikin FBI in hriattir lawkna a dawn bawhzui dan a tha tawk em tih chu chiang taka chhui a nih tur thu a sawi. Zirna in luh chilha zirlaite silai-a pawng kah chiamna hi US ah hian a lo thleng fo tawh a, kum 2007 khan Virginia ah mi 32 kahhlum an ni a, 2012 ah Connecticut Sandy Hook ah mi 27 kahhlum an ni a, tun tuma Florida Parkland inkahna ah hian mi 17 kahhlum an ni a, heng bakah hian 1999 khan Colorado ah 13 kahhlum an lo ni tawh a, 2005 ah Ninnesota Red Lake ah mi 10 kahhlum an ni a, 2015 khan Oregon Umpaqua Community College ah mi 9 kahhlum an lo ni tawh bawk.