France hnen atanga indo thlawhna Rafale fighter lei dan turah sorkar in dan dinglai tam tak bawhchhiain, committee tam tak a thlawhkhum tir niin Congress hruaitu P Chidambaram a’n a sawi.

Finance Minister hlui chuan inremna ziah dawnin cabinet committee on security pawh sorkarin a rawn lo niin a sawi a, Rafael inremnaa tih dan phung pangngai zawm a nih loh chhan chu a zawhna a nih thu Kolkata-a chanchinbumite a kawmnaah a sawi. Finance Minister hlui chuan UPA sorkar laia thlawhna man thua inremna an lo siam tawh leh NDA sorkar hnua inremna chu a inthlau hle niin a sawi bawk a, UPA hunlaiin Rafael thlawhna pakhat man chu cheng vbc 526 anih laiin tuna NDA hnuaia inremna chu cheng vbc 1670 a ni a ti a, a let thum vela thlawhna man a sang chho ta thut chu thil mak a ni a ti bawk.