Aizawla motor nei zawng zawng, Garage nei vek tura tih an nihnaah Aizawla Local Council 83 zinga 35-in an veng chhunga Garage nei leh nei lo an en fiahna Report an la theh lut lo. Traffic Police hotute hnen a\anga thu dawn danin, Aizawla lirthei nei zawng zawng, Garage nei vek tura sorkar-in a hriattirnaah hian Local Council tin chu an veng chhunga Garage nei leh nei lo enfiah vek tur leh, an Report chu Traffic hotute hnena thehlut vek tura tih an ni a, hemi bawhzui hian vawiin thleng khan Local Council 83 zinga 48-in report an thehlut tawh a, report la thehlut ve lo veng 35 an awm a ni. Traffic hotute chuan, Report la thehlut lo Local Council-te chu a rang lama bawhzui tura ngen an ni tih an sawi a, sorkar thuchhuak hi khauh taka ken kawh chhunzawm zel a nih tur thu leh, Local Council-in Garage neite hnena Certificate a pek pawh a khat tawka endik \hin a nih tur thu leh Krismas dawna ngaihdamna tel lova lirthei an endik \hin ang deuha endik tur a nih thu an sawi. Tun hnaia Garge nei leh nei lo enfiah \uma kawngpui dunga lirthei riah tur ni lo, veng danga leng, kawngpui sira lirthei dah man an awm nia sawi chu thil thleng palh theih a nih thu sawiin Traffic hotute chuan, mi ina leng leh mikhual motor chu man tur a nih loh thu leh mikhual, lirthei neite chu an thlenna Local Council-ah in report a, an hriatpuinain kawngpui zau laiah lirthei dah dan tur ruahman tum a nih thu a sawi.
Traffic hotute chuan, kawngpui dunga lirthei zan riak a awm leh awm loh hi a khat tawka endik zel a nih tur thu an sawi a, an endikna hmun tur leh hun tur chu puan zar lawk a rem lova, an endik tur venga Local Council hruaitute erawh chu an endik dawnah hriattir hmasak zel an nih tur thu an sawi bawk.
