Govt. Bethlehem Vengthlang High School zirlai, Chite lui dung zawhtute chu INTACH, Mizoram Chapter Convener, Pu C. Chawngkunga’n vawiin khan Chite luikamah a vailiam. He Chite Lui Trekking for School Children hi Save Chite Lui Coordination Committee, INTACH, Mizoram Chapter leh tangho buatsaih a ni a, heng mite thlah liamna inkhawma thusawiin Pu C. Chawngkunga chuan Chite Lui thenfai beihpuithlak hnuah Tuirial leh Tlawng lui te thenfai beihpui thlak leh a, chumi hnu chuan Mizoram pum huapa hmalak a theih tawh dawn niin a sawi a, khawpui thianghlim leh changkang, Smart City nei tur chuan a chhunga chengte rilru siamthata tihchangkan phawt a ngai a, Chite luia bawlhhlawh leh leivung paih loh a tul tih a sawi bawk. He inkhawm hi Save Chite Lui Coordination Committee Working Chairman, Pu Dunglena’n a kaihruai a ni. Chite lui dung zawhtute hi zirlai 20 an ni a, an Headmaster leh zirtirtu 3 ten an tawiawm a, an zingah hian INTACH, Mizoram Chapter hruaitute leh Save Chite Lui Coordination Committee hruaitute an tel bawk a, Bethlehem Vengthlang kai atangin Ramthar Veng kai thleng an zawh a ni.
