Govt. J. Thankima College-in vawiin khan Bawngkawn Brigade-a an College ram chin nia an ngaih hnatlangin an hung a. Hnatlang zingah hian Principal bakah zirtirtu, Office hnathawk leh zirlaite an tel a, Sorkarin kum 2013-a Land Lease a pek huam chin nia an hriatah ban phunin thlirlenin an hung a ni. Govt. J. Thankima College Staff Welfare Association hruaitute chuan tun hnai thla 2 thla 3 kalta vel atang khan an ram huam chin nia an hriat chu mi thenkhatin an nek nasa niin an sawi a, Block III huam chhungah Concrete Building 3 leh Assam Type 1 sak thar a ni a, hengte avang hian an ram chin chu humhalh tul nia an hriat avangin hnatlanga hung a nih thu leh Block III huam chhunga mi thenkhat in sakna chu Land Revenue and Settlement Department-ah teh that sak tura dil mek a nih thu sawiin, vawiin hnatlangah hian Block I leh II chu harsatna awm lova hung niin an sawi a, Block III-ah chuan thubuai a awm avangin an hung thei ta rih lo niin an sawi.
Govt. J. Thankima College Principal, Dr. C. Lalremruata chuan tun hnaia an College Campus chhunga mipui tana thil hriat nuam lo tak a thleng chu pawi a tih thu leh he thil titute chu tute nge an nih an hriat loh thu a sawi a. An College ram chhunga an phalna tel lova insak, tuten emaw an thiat chu an tih duh reng, Court leh Sorkar hotute hnenah pawh tum engemawzat ti tura an lo ngen tawh a nih rualin, a tuartu chhungkua an awm dawn avanga anmahnia an tih duh si loh a nih thu a sawi. Dr. C. Lalremruata chuan, kum 2013-a Mizoram Sorkar-in College hmun a pek hnuah ram inchuh vanga harsatna an tawk chho mawlh mawlh nia sawiin, hetiang harsatna hi awm tawh lova zirlaite tana inpumpek chu amah leh a thawhpuite duh dan a nih thu a sawi a, thuneitute chu he buaina hi chinfel sak thuai turin a ngen a tih sawiin, hetihrual hian theihtawp chhuaha an College ram an humhalh chhan chu ram leh hnam innghahna tlak zirna siam an duh vang niin a sawi a ni. Puan tawh angin Bawngkawn Brigade rama Govt. J. Thankima College leh Pi B. Lalhmangaihi ram inchuh laia cheng Pu Lalhmingliana-te chhungkaw luah lai chu Thawhlehni chawhma dar 11:40 vel khan a luahtute awm loh laiin mi thenkhatin an thiat a, he thil thleng chungchangah hian ram neitu, Pi B. Lalhmangaihi chuan Bawngkawn Police Station-ah FIR a thehlut a ni.
