Govt. J. Thankima College zirlai ten an College Campus chhunga in sak nia an sawi chu thiah tum

0
425
views

Govt. J. Thankima College zirlai ten an College Campus chhunga in sak nia an sawi chu vawiin khan thiah an tum a, Police te an inrawlh hnuah buaina lian lutuk chhuak lovin zirlaite hi an tin darh.

Zirlai ten in thiah an tum lai hian, police thahnem tak an pungkhawm hman a, in kawta hul hliap zar, eirawngbawlna atana hman chu an tihchhiat sak hman a, an tuizem pahnih pawh lum sakin, zirlai thenkhat chuan bang thenkhat an lo pawt kau hman bawk. Police thahnem takin an dan avangin zirlaite hi an che hlei thei lo a ni. Zirlai te hian resolution siamin, In luah mektu, Pu R. Lalhmingliana te chhung chu an college ram atang a rang taka chhuak turin an phut tih an sawi a. Sorakar in college ram a pek chhunga dan lova chhungkaw awmte chu tun thla ni 18 hmaa hnawhchhuah sak turin sorkar an phut bawk a. Hun tiam chhunga an chhuak lo a nih chuan a tawp thlenga an nawr tur thu an resolution pass ah hian an tarlang a ni.

ZONET thudawnna dan chuan Pi B. Lalhmangaihi Chaltlang Dingdi veng hian kum 1970 leh 1973-ah helai hmunah hian Land Lease a nei a. Sorkar in kum 2013 khan Govt. J. Thankima College hmun tur hi a pein Land Lease pawh kum 2013 vek khan a pe chhuak a ni. Addl. District Magistrate Pu John LT Sanga chuan kum kalta octrober ni 3 khan Govt. J. Thankima College Campus chhunga ram nei anga insawi, Pi B. Lalhmangaihi hi dan lova in sa a nih thu hriattirin chhuak turin a ti a. Pi B. Lalhmangaihi hian sorkar chu court-ah a khing let ve thung a, thubuai hi Court ah a inchiah mek a ni.