Gujarat Assembly inthlan thawh hnihna zo

0
363
views

Gujarat Assembly thar din tura vote thlak thawh hnihnaah vawiin khan mipuiten vote an thlak a, vote tla zat hriat a la ni lo. Vote thlaktute zingah hian PM, Narendra Modi pawh a tel a, Ahmedabad district-a Sabarmati biala vote thlakna hmunah chhun lai velah khan vote a thlak a ni. PM hian Mumbai-a tuihnuailawng thar, INS Kalvari chu ram tana a hlan hnuah Ahmedabad hi a pan a ni. Vawiina vote thlakna hi he state hmar lam leh state laili lama bial 93 a ni a, vote nei, vbc. 2 leh nuai 20 vel an awm a, candidate 851 an awm bawk. Vote thlak hmasak, tun thla ni 9 khan bial 89-ah vote thlak a ni tawh a, Gujarat Assembly-ah hian seat 182 a awm a ni. PM b^kah hian vawiina vote thlakte zingah BJP President, Amit Shah, Union Finance Minister Arun Jaitley, state Congress President Bharat Solanki leh Patidar hruaitu, Hardik Patel-a te an tel a, Pu Modi-a nu, Hiraba, kum 95 mi pawhin Gandhinagar-ah vote a thlak a ni. State Chief Electoral Officer, B.B. Swain-a chuan dist. 14-a vote thlakna hmun 25,000 zetah vote thlak a nih thu a sawi a, vote thlakna hmun 1,700 velah chuan thil awm dan, LIVE-a tihchhuah a ni. Kum 2012 Assembly inthlanah khan BJP chuan bial 182-ah 115 a la a, Congress-in 61 an la a, tunah hian BJP hian kum 22 vel, he state-ah hian ro an rel tawh avangin thil awm dan a danglam thei ang em, tih chuan ngaihven a hlawh hle a, tun thla ni 18-ah vote tlate hi chhiar a ni ang.

Congress party chuan vawiin khan PM-in vote a thlak pahin lamlianah campaign-naa ngaih theih thil a ti nia sawiin, Election Commission-an an thlen a, hei hi Model Code of Conduct bawhchhiatna niin Congress thupuangtu, Nikunj Balar chuan a sawi. PM hian Ranip khaw sikula vote a thlak hnuah, a chuanna motor-ah ding chhuakin mipuite hmuh theih turin a ban a vai a, hetiang hian minit 10 zet, kawngpuiah a tlan a, hei vang hian an party Legal Cell Chairman, Yogesh Ravani chuan state Chief Electoral Officer, B.B. Swain leh, Chief Election Commissioner, Achal Kumar Joti hnenah PM thil tih dan sawiselna an thlen niin a sawi. Finance Minister hlui, P. Chidambaram-a pawhin vote thlak ni-a mipui hmaa hetianga thil tih hi model code of conduct bawhchhiatna niin a sawi a, BJP leh PM thil tih dan chu campaign-na dik tak nia sawiin, Election Commission chu a tih tur ti lo-ah a puh a ni. PM hi vote thlakna hmun a\angin metre za zel, ke-in a kal a, a bul hnaia lo awmte chu a kut, vote thlak tawhte chhinchhiahna kai chu entirin a lek kang a, hei pawh hi Congress chuan dan bawhchhiatna niin an sawi. Vote thlakna hmun a chhuahsan chiah hian PM hian a u, vote thlak ve tur, Somabhai Modi a hmu a, PM chuan zahna chibai b<k nan a u ke chu a khawih a, kut vuanin chibai an inbuk bawk a ni.