Zonet zawhna chhangin Pu J Lalsailova chuan candidate tura amah an sawmna chungchangah Hachhek Constituency NGO Coordination Committee kuta awm a nih thu leh amah mimal chuan engmah sawi theih a neih rih loh thu a sawi a, Nomination file theihna hun tawp chu naktuk tlai dar thum anih tawh avangin nomination chu file phawt a ni ang a, thil awmdan azirin, din tlang a lo ngai ta lo anih chuan inhnuhdawh leh mai tur a nih a rin thu a sawi.
Hachhek Constituency NGO Coordination Committee hruaitute hian Aizawlah mipuite pawmtlan theih tur candidate dapin Pu J Lalsailova, Mission Vengthlang, Central YMA Treasurer hlui leh tuna CEC member nilai hi an dawr a ni.
Thuchhuah an siamah, Hachhek Constituency NGO Coordination Committee hian Hachhek biala Tuikuk Candidate an awm chuan mizo mipui aiawh tur common candidate neih an tum thu hi an sawi a, ram leh hnam humhalh duhna avanga an sawmna pawmtu Pu J Lalsailova chungah lawmthu an sawi a ni.
Hachhek bialah hian BJP ticket-a ding turin Bru pawl hrang hrang aiawhte chuan Damparengpui mi, Joseph Lalrinawma Toimoi chu an rawt nia sawi a ni a, Hachhek bialah hian Tuikuk vote nei aiin Mizo Vote nei sang 4 vel chauhin an tam zawk a, Party hrang hrangin candidate an dah chuan an vote inpawt darh tawnin Tuikuk ten candidate tura an rawt hi a chak thei mai dawna ngaiin, Hachhak Constituency NGO Coordination Committee hian hetiang hian common candidate nei turin hma an la ta a ni.
