HIV/AIDS veite thisen endikna khawl, CD4 Count Machine Health Minister, Pu Lal Thanzara’n a hawng

0
809
views

Mizoramin HIV/AIDS veite thisen endikna khawl, CD4 Count Machine a dawn thar chu vawiin khan Health Minister, Pu Lal Thanzara’n a hawng. Hemi puala inkhawm Kulikawna Health Workers Training School Conference Hall-a neihah Health Minister chuan, hetiang khawl nei tur hian National AIDS Control Organization phalna a ngaih avangin duh duha lei mai theih a nih loh thu a sawi a, State dang mihring tamna leh indaih lo zawkte pek an nih loh laia, Mizoramin khawl thar 3 a dawn belh chu a hlu hle tih a sawi a. Tuna HIV hrik pai mekte chu he khawl thar hi an hriselna tha taka vawn nan hmang tangkai turin a chah a ni. Mizoramin CD4 Count Machine a dawn tharte hi Kulikawn, Mamit leh Kolasib damdawi ina dah tur a ni a. A hawnna inkhawm hi Health Department Principal Director, Dr. F. Lallianhlira’n a kaihruai a, MSACS Project Director, Dr. Lalmalsawmi Sailo pawhin thu sawiin, HIV hrik kai hmuhchhuah tawh leh la hmuhchhuah loh, ART damdawi ei lote chu he natna hrik thehdarhtu langsar ber an nih thu a sawi a, tuna Mizoram dinhmun enin kohhran pawhin HIV chungchangah tum nghet tak an neih a tul tawh tih a sawi. MSACS chhinchhiah danin, Mizoramah HIV hrikpai, ART Center-a inziaklut mi 12,000 vel an awm mek a, chung zinga mi 6,623-in ART damdawi an ei mek a ni.