Hmeichhe baihvai te tanpuina hmun tur One Stop Centre Social Welfare Minister-in hawng

0
610
views

Social Welfare Department in Durtlanga hmeichhe baihvai te tanpuina hmun tur One Stop Centre a siam chu vawiin khan social welfare Minister Pu PC Lalthanliana’n a hawng.

One Stop Centre hi Women & Child Development Ministry bultumin hmeichhia hleilenna tuar leh baihvaite tana tluk luhna leh inhumhim lailawkna hmun atana buatsaih a ni a. He hmun pantute hi Centre ah hian ni 5 chhung an awm thei ang a, an awm chhung hian ei leh in riahna leh mimal nitin mamawh hrang hrangte a thlawna pek thin an ni ang a, damdawia inenkawlna te leh an mamawh counselling te pawh mithiam ten pe in, an dikna chanvo humhalh turin dan leh hrai lamah pawh tanpui an ni dawn bawk a ni. Centre hawnna thuchah a sawiah Social Welfare Minister Pu PC Lalthanliana chuan hmeichhia te himna tur leh an hamthatna turin sorkarin hma a la zel a, Inchhungkhura harsatna tawk leh kut tuar thin te tanpuitu tur Mahila Police Volunteer Scheme pawh hmang thei tura hmalak mek a ni a ti. One Stop Centre-ah hian Centre Administrator Office, Staff Room ,Dressing room, Video conference room leh bedroom 2 awmin khum 5 dah a ni a, darkar 24 chhung dawr theih reng an ni ang. Sorkar laipuiin State tin te One Stop Centre nei tura a hriattir angin Mizoramah pawh kum 2016 atang khan Khatlaah Women Helpline hmanga bul tan a ni a, din a nih atangin Case 24 an buaipui tawh a ni.