IMF-in chhiah tihpun tum dodal

International Monetary Fund IMF in Donald Trump-a’n Steel leh Aluminium-a chhiah lak tihpun a tumna a dodal a, Trump-a hian Steeel ah zaa 25 leh Aluminium ah zaa 10-a chhiah tihpun a tum a ni. IMF hian Trump-a hmalak tum dan hian US bakah ram dangte tan pawh harsatna a thlen dawn a ni an ti a, ram dangten Trump-a tih dan ang hi an entawn ve a nih chuan harsatna lian zawk a thleng thei a ni an ti. US hnena steel thawnluttu lian ber Canada chuan chhiah hi tihsan a nih chuan ramri-a insumdawntawnna-ah buaina nasa tak a thlen dawn a ni a ti a, Trump-a hian a thil tum hi a kaltlangpui a nih chuan ram dang thahnem takin an beihlet tur thu an puang tawh bawk. World Trade organisation Director General Ruberto Azevedo chuan sumdawnna hmanga indona hian tu ram tan mah hlawkna a thlen lo a ni a ti. Sumdawnna lama mithiamte chuan Trump-a’n chhiah lak tih pun a tumna hi kaltlangpui a nih chuan America-ah pawh hnathawh tur a tlem phah dawn niin an sawi a, hei hian a tawpah thil man ti sangin, America chuan a tuar let zawk dawn niin an sawi bawk.