India jet fighter pilot Pakistan in a man chu chhuah thuai India in a phut.

0
341
views

Kashmir chungchanga Nuclear ralthuam nei ram pahnihte in epna boruak \ang tak karah Pakistan hian India indo thlawhna hi a kapthla a, India pilot hi hmaituam-a thisen kai chunga a video thlalak chu Pakistan Information Ministry chuan a phochhuak a, hei hi India chuan na takin a dem nghal a, Pakistan Foreign Ministry hian he video thlalak hi a paih leh nghal a ni. India-a social media hmangtu tam takin pilot hi ram hmangaihtu-ah puangin an chawimawi thu an sawi nasa hle.

Indo thlawhna hmanga ram pahnihte inbeihna thleng hi kum 1971 indo hnua a thlen leh vawi khatna a ni a. Pakistan chuan India indo thlawhna pahnih an kapthla niin an sawi a, hei hian ram pahnih inkar boruak a ti \ang leh zual a ni.

Indian Air Force Pilot hi Wing Commander Abhinandan a ni tih finfiah a ni a, a tirah man a nih hlima hmai tuam leh thisen kai chunga a mantuten thu an zawt lai video chu Pakistan Information Ministry in pholangin a hnu lawkah an paih leh nghal a, hemi hnu hian hmai tuam tawh lova thingpui a inlai video thlalak chu tih lan leh a ni bawk. Hetah hian a hming leh sipaia a nihna te zawh a ni a, enge a tih tum ber tih zawhna chu a chhan theih loh thu a sawi a ni.

India Airforce Pilot Abhinandan Varthaman hi kum 16 chhung experience nei tawh, Chennai lam chhuak a ni a, kum 2004 ah fighter pilot atan lakluh a ni a, a nu chu doctor a ni a, kum 30 chho vela upa nia sawi a ni. Pakistan sipai thupuangtu Maj Gen Asif Ghafoor chuan pilot hi sipai inkaihhruaina dan dinglai anga enkawl a nih thu a sawi.