International Womens’ Day chu MHIP General Headquarters buatsaihin hmang

0
944
views

Khawvel puma hmeichhiate ni, International Womens’ Day chu MHIP General Headquarters buatsaihin vawiin khan Lal Thanhawla Auditorium-ah hman a ni a. A hmanpuitu MHIP Patron, Pi Lalriliani chuan, kumina International Womens’ Day thupui chu Press for Progress tih a nih angin, hmeichhiaten hma an sawn zel theih nan theihtawp chhuaha tanlak a tul tih a sawi a. World Economic Forum chhut danin, mipa leh hmeichhe inthlauhna tibo tur chuan kum 100 tel ala ngai ang tih a ni a, hetiang a ni chung hian Mizoram bikah chuan mipa leh hmeichhe inkara inthlauhna lutuk a awm lova, hmeichhiate laka hleilenna chi hrang hrang awm thei veng turin Sorkar-in dan tha tak tak a duan tawh avangin an vannei hle tih a sawi. He inkhawm hi MHIP President, Pi Saipuii’n a kaihruai a, SCERT-a Lecturer, MHIP Senior Adviser nibawk, Pi V. Vanlalruati’n kumina International Womens’ Day thupui ‘Press for Progress’ tih a sawifiah a. An pawl Vice President, Pi Lalthlamuani’n thu a sawi bawk.