Inthlan dawn hnaihah political party-te zingah dik lo taka WhatsApp hmang \hin an tam avangin WhatsApp company-in vaukhan lawkna a ti chhuak.

0
570
views

WhatsApp hman tam berna India ramah hian a hmangtu mtd 200 chuang an awm a, May thla-a Lok Sabha inthlan lo awm turah BJP leh Congress te chu thudik lo thehdarhah inpuhtawnin, campaign na hmanrua pawimawh takah WhatsApp hi an hmang ve ve a, WhatApp head of communications Carl Woog chuan inthlan dawn hian political party engemawzatin a ni lo zawngin WhatsApp hman an chin avangin political party te chu WhatsApp chu chanchinthar thehdarhna hmanrua a nih loh thu a hrilh a, a dik lo zawnga hmang lui an awm a nih chuan khap theih a nih thu a sawi a, heng hman diklohna te hi haichhuah a, a hma thei ang bera tihtawp a nih theih nan theihtawp an chhuah thu a sawi bawk a ni.

Nikum khan WhatsApp hmanga thu dik lo thehdarh vanga mipui pungkhawmin mi an tih hlum avangin inhnialna a tam phah hle a, WhatsApp hian thu dik lo thehdarh hi khuahkhirh tumin mipui te zirtir nan thuziak bakah, radio te leh roadshow campaign te an huaihawt a, vawikhata message forward theih chin pawh mi 5-ah an bituk bawk a ni. Khawvelah hian WhatsApp hmangtu mi tld 1.5 an awm a, thla tin mtd 2 vel chu an account tihtawp sak an ni \hin a, India ramchhung ami account tihtawp zat erawh WhatsApp company hian a sawi lang lo a ni.