Inthlana bial khat aia tam chuh khap rawtna Attorney General leh Election Commission hnenah SC-in pe ve

0
361
views

Inthlana bial khat aia tam chuh khap rawtna, Supreme Court-a thehluh bawhzuiin court sang ber chuan he rawtna copy hi Attorney General leh Election Commission pek ve ni se a ti a, he rawtna ngaihtuahtu, Chief Justice Dipak Misra leh Judge dang pahnih – A M Khanwilkar leh D Y Chandrachud-a awmna bench chuan he thupek hi a siam a, mi pakhatin bial pakhat aia tam a chuh a, a tlin ve ve chuan, a hnuah pakhat a chhuahsan a ngai a, hemi hnawhkhah nan hian inthlan buatsaih that leh a tul thin avangin senso pawh a tisang duh hle tih court chuan a sawi a, kum 2004 leh nikum December thlaah pawh khan, bial khat aia tam, mi pakhatin an chuh theih loh nana inthlan dan siam that rawtna hi a lut tawh nia hriat a ni. Inthlan apiangin candidate langsar leh chak deuhte chu bial khat aia tamah an ding thin a, tuna PM, Narendra Modi pawh hian kum 2014 Lok Sabha inthlan khan Gujarat-a Vadodara bial leh Uttar Pradesh-a Varanasi bial a chuh a, a tlin ve ve hnuah Vadodara bial hi a chhuahsan a ni. Ukil pakhat, Ashwini Kumar Upadhyay chuan hemi chungchang hi court sang berah hian a thlen a, National Commission to Review the Working of the Constitution (NCRWC) leh Election Commission of India duh dan angin, Parliament leh state Assembly inthlan chu mi pakhatin bial khat bak chuh thei lo se a ti a ni.