New Kawnpuia IR sipai pahnih sawisak an ni chu MZP General Headquarters in na takin a dem.
MZP hian he thil thleng ngaihtuah hian Emergency Meeting a ko a, thutlukna hrang hrang an siam hnuah, Home Minister, Pu Lalchamliana an hmu a, an rawtna te an thlen.
MZP chuan Covid-19 thila ramria duty, 5th IR duty pahnih – C. Lalhruaitluanga s/o C Lalnunsanga, Republic Veng leh R Zairemmawia s/o R Vansawma, Hlimen Veng te’n Chakma kut an tuar chu thinurthlak an tih thu leh an lawm loh thu an sawi a, uniform pawh an hak laia hetianga Mizoin kut an tuar chu an rilru a nat thu leh an dem thu an sawi.
MZP chuan tharum thawhna thleng vang hian Zomuantlang-a Police OC ni lai, Chakma pa chu a rang thei ang bera sawn chhuah an phut a, darkar 24 chhungin police force tam zawk duty tura dah belh turin sorkar an phut bawk a, pawikhawihtute a rang thei ang bera man an nih loh chuan a man turin Mizo ṭhalaite an chet chhuah tur thu an sawi. Mizoram leh Tripura ramriah Tripura lam aṭanga duty tura lo thawk chhuak ṭhin Chakma te chu ramri hnaihah duty ve tawh lo tura an duh thu an sawi bawk a ni.
C Lalhruaitluanga leh R Zairemmawia te hi vawiin khan Aizawl Civil Hospital-ah phurh thlen an ni a, MZP hruaitute hian lo hmuakin kanna pawisa an pe a, an in enkawlna senso zawng zawng Mizoram sorkarin tum sak se an duh tih an sawi.
MZP hruaitute leh Adviser-te chuan vawiin tlai khan Home Minister Pu Lalchamliana chu a chenna in Electric Vengah an hmu nghal a, rawtna chi hrang hrang thlen nghal a ni.
