Kum 62 mi, Soleimani hi Middle East-a Iran ralrelna-a thluak bur ber, Iran sipai chhuanvawr Quds Force hotulu a ni a, Irag khawpui Baghdad airport bulah sipai dangte nena an tlan laiin US sipaite hian thlawhna hmangin an that a, US sipaite hi President Donald Trump-a thupek-a che an ni.
General Soleimani thah a ni hian US leh Iran inkar boruak a sosang hle a, Iran Supreme Leader Ayatollah Ali Khamenei chuan tualthattute lakah na taka phuba lak a ni ang tih a puang a, Soleimani hi ni thum chhung Iran in a sun dawn tih a puang nghal a ni.
General Soleimani hi Iran hruaitu lu ber Ayatollah Ali Khamenei dawta hruaitu langsar ber zinga mi a ni a, a kaihhruai Quds force hi Iran Revolutionary Guards hnuaia awm sipai unit \ha mi-a ngaih a ni a, Ayatollah hnenah hian an in report \hin a, Iran ah chuan Soleimani hi ram tana mi ropui leh mite ngaihsan a ni.
Hetihlai hian US thung chuan Quds Force te hi mifirfiak pawlah a chhal thung a, US mi leh sa tam tak thihna-a mawhphurtu an ni a ti thung.
US President Donald Trump-a chuan Soleinami thah a nih thu puanzar a nih hnu lawkah US hnam puanzar chu twitter ah a pholang nghal a, US sipai hmunpui, Pentagon chuan General Soleimani chu Iraq leh a chhehvel-a US hmun pawimawhte beih tuma ruahmanna siamtu a ni a ti a, sipaite chetna chu Iranin US beih a tumna beihletna a ni a ti.
General Soleimani thah a nih rual hian khawvel pumah tuialhthei man zaa 4-in a sang nghal a ni.
General Soleimani leh Iranin a puih sipai pawl hotu \henkhat hian Baghdad airport hi car pahniha an chhuahsan laiin US thlawhna drone chuan an chuanna car hi a kap a, Soleimani hi Lebanon emaw Syria emaw a\anga Baghdad-a thlawk lut hlim nia sawi a ni a, an chuanna car hi missile \hahnem takin a kap fuh nia sawi a ni a, mi 5 aia tlem lo an thi a ni.
Iran Revolutionary Guards chuan Iraq-a sipaite puitu raldomi militia hruaitu Abu Bahdi al-Muhandis pawh thi zingah hian a tel tih an sawi.
Pentagon chuan thuchhuah siamin, President thupek angin US sipaite hian US mi leh sa te humhim nan Qasem Soleimani hi an that tih a sawi.
Tunhnaiah Iraq-a US Embassy chu mipuiten hualin an lo bei tawh a, US sipaiten embassy hi an chhan chhuak a, hetianga embassy beihna hi General Soleimani-a ruhmanna a ni tih Pentagon chuan a sawi.
Iran sipai \ha chhuanvawr Quds Force hotu Qasem Soleimani hi Middle East-a Iran thil tih theihna ber, an thluak bur bera ngaih a ni a, indo leh remna siam kawngah Iran foreign minister ang tluka sawi a ni a, thah a ni ta hian US leh Iran inkar bakah Middle East-a US sangawizawnpuite tan pawh nghawng na tak nei tura ngaih a ni.
