Israel PM-in Taj Mahal tlawh, Mumbai-ah Moshe Holtzberg nen inhmu dawn

0
510
views

Israel PM, Benjamin Netanyahu chuan vawiin khan Taj Mahal a tlawh a, a nupui, Sara leh mi pawimawh dangten an \awiawm a ni. Kum zabi 17-naa sak, Mughal lal, Shah Jahan-a’n a nupui Mumtaj-i thlan in a sak tlawh tura a kalnaah Netanyahu hi Kheria \umhmunah UP CM, Yogi Adityanath-a’n a lo dawngsawng a, Braj hnam lam thiam leh zaithiamten an thiam an lo entir a, Israel PM-in a tlawh avang hian Taj Mahal hi mi dang tan darkar 2 chuang khar a ni. Pu Netanyahu hian Hotel Amar Vilas-a chaw chhun a ei hnuah New Delhi a pan leh a ni. Israel PM hian President Ram Nath Kovind pawh Rashtrapati Bhavan-ah a hmu a, ram pahnih, lo neih leh thil thar chhuah lama an thawh dunna entir nan olive thingpui buatsaihsak a ni a, he thungpuife hi Rajasthan sorkar leh Israel rama an thawhpuiten Rajasthan Olive Cultivation Ltd an din, Bikaner khuaa siam chhuah a ni. Puan tawh angin, nimin khan India leh Israel sorkar aiawhten kawng hrang hranga thawh hona tur thuthlung 9 an ziak fel a, Pu Netanyahu-a lo zin hi sumdawnna lama mi pawimawh 130-in an rawn zui a, Delhi b^kah Agra, Ahmedabad leh Mumbai an tlawh dawn a ni.

—–

Kum 2008 November ni 26-a mi firfiakten Mumbai-a pawi an khawih \uma an kah hlum, Juda nupa fapa, Moshe Holtzberg-a chuan tukin khan Israel ram a\angin Mumbai a thleng leh a, a thil tawn hi a rapthlak em avangin he naupang, Baby Moshe tia hriat hian lainat a hlawh hle a, a nu leh paten an thihsan a\anga kum kua a liam hnuah, a awmtu, India mi, Sandra Samuel-i nen an lo haw leh ta a ni. Moshe-a hian kum 13 a tlin hunah Mumbai hi tlawh leh a tum na a, PM, Narendra Modi-a’n nikuma Israel a tlawh khan lo zin thuai tura a sawm avangin, a tum hun thlen hma kum hnihah Mumbai hi a tlawh leh ta a ni. Khami \umah khan Moshe-a hi a awmtu, Sandra Samuel-i hian hmun himah a tlanchhiatpui avangin a him a, mi firfiakten Chabad House an beih khan a nu leh pa, Rabbi Gavriel Holtzberg leh Rivka chu an kap hlum a ni. Chabad House enkawltu, Rabbi Israel Kozlovsky chuan Moshe-a’n he hmun a tlawh leh ta chu a lawmawm hle a, a lungchhiatthlak hle bawk tih sawiin, tunah hian kum 11 lai ni tawh mah se, khatih lai khan kum hnih mi chauh a nih avangin anni tan chuan naute a la ni reng tih a sawi. Chabad House hi Ningani khian Israel PM, Benjamin Netanyahu-a’n a tlawh dawn a, hetah hian Moshe Holtzberg-a hi a lo awm dawn a ni. Mi firfiakten a nu leh pa an kah hlumsak hnuah hian Moshe hi Israel ramah a haw a, a nu lama a pi leh pute hnenah, Afula khuaah a cheng a, rilru lam mi thiamte chuan, kha thil thleng rapthlak tak khan Moshe-a thinlungah nghawng \ha lo leh dam chhung daih tur thil a hnutchhiah lo niin an hria a, mahse Mumbai hi a theihnghilh ngai lo a, a hriat loh hlanin Hindi a lo hmang leh \hin niin an sawi bawk.