Israel PM-in thamna pea puh a nihna pha

0
431
views

Israel Prime Minister Netanyahu chuan thamna pea puh a nihna chu thu dik lo niin a sawi. Israel Television ah thu sawiin, Netanyahu chuan amah puhna chu thu dik lo, phuah chawp mai nia sawiin, thu dik chu a la rawn lang chhuak mai dawn a ni a ti. Police te chuan Netanyahu hi thamna pek chungchangah finfiahna chi hnih an nei nia sawiin, thubuai siamsak theih a nih thu an sawi a. Hetianga amah puhna hian engmah a thlen dawn lo niin Netanyahu chuan a sawi a, amaha mipuiten rinna an nghah chhung chuan Israel ram hruai hna chu rinawm tak leh tling taka a thawh chhunzawm zel tur thu sawiin, inthlanpui neih leh turah pawh mipuite rinna hlawh chhuak zo ngei tura hna a thawh zel tur thu a sawi thung. Kum 68 mi Netanyahu hian Prime Minister term hnihna a chelh mek a ni. Kum 12 chhung Prime Minister hna a chelh tawhah tum 15 zet chhui a lo tawk tawh tih Netanyahu chuan a sawi bawk a, tun tuma amah chhui tumna pawh a zuzi leh ngei dawn niin a sawi. Netanyahu hi a chanchin tha lam tarlang tura Israel Newspaper pakhat Yediot Aharonot Editor hnena thamna pe-ah puh a ni a, hei bakah hian Hollywood milar Arnon Milchan lak atanga thilpek Shekel maktaduai chuang hu dawngah puh a ni.