Jampui Mizo Convention-in Mizo IR duty ten kut an tawrh dan a hmuna an zir chian hnuah kutthlaktute an dem thu an sawi a, Mizoram leh Tripura ramria Mizote thlavang hauh zel an tum tih an puang.
Jampui MC chuan Chakma mipui inhawrkhawmin Mizo IR duty pahnih kut an thlak rawn chu an dem thu leh, an inkara remna zawnga ban phar, Zomuantlang VC pawhin kut an tuar leh vau zui an ni chu demawm an tih thu an sawi a, he thil thlengah hian mawhphurtu leh mi fuihpawrhtu mimal engemaw zat an awm niin an hriat thu an sawi a, pawi khawihtute dan anga na taka hrem an phut thu an sawi bawk.
Jampui MC hian vawiin (19 April, 2020) khan New Kawnpui Chakma khawtlang hruaitute leh, Zomuantlang khawtlang Bru hnam hruaitute leh Vanghmun Police Station (Tripura) OC leh a hote leh Mizoram sorkar lam aṭangin SP leh a hote nen inpawh tlâng takin thil awmzia sawihona an neih thu leh Chakma hruaitute pawh an zilhhau tih a sawi bawk a, Jampui MC Youth Wing hruaitute pawhin Chakma mipuiin Mizo tlangval pahnih kut an thlak avanga an lungawi loh thu leh hetiang a thleng leh a nih chuan Jampui Mizo ṭhalai chet chhuah tumte an dan theih tawh loh an hlauhthawn thu te pawh an sawi chhuak tih a tarlang bawk a ni.
Jampui Mizo Convention chuan Tripura leh Mizoram ramri vela cheng Mizote thlavang an hauh reng thu leh a ṭul dang ang zela hma lak an tum thu an sawi bawk a, IR duty pahnih kut tuarte ṭanpuina atan cheng 5000 ve ve an thawn bawk a ni.
