Japan-in North Korea that chhuah anga langin khawvel a dawi â tur ni lo ti

0
780
views

Japan chuan North Korea in tunhnaia that chhuah anga a lanna chuan khawvel a dawi â tur a ni lo a ti.
Japan Foreign Minister Taro Kono chuan he thu hi Winter Olympics-a North Korea tel ve a tum chungchang, Canada-a sawihona ah a sawi chuak a, Vancouver-a foreign minister 20 rual pungkhawmte hian North Korea chu nawr zui zel an rel a, hemi rual hian North Korea leh South Korea te inbiakna kallai chu an thlawp thu an sawi bawk.
Khawvel ram hrang hrangten an hrekna karah kum 2 kalta chhung khan North Korea hian a nuclear ralthuam leh ralthuam changkang dangte a ti changtlung nasa hle a, November ni 28-a Ballistic Missile a kah chhin leh hnu khan UN chuan petrol a lakluh leh phurh kual velna kawngah a hrek belh leh a ni.
Hetihlai hian North Kore hruaitu Kim Jong-un chuan tun thla tir lam khan South Korea nen inbe tura a in hawn reng thu sawiin, thla thara South Korea-a Winter Olympics neih turah pawh infiammi tirh ve a duh thu a sawi a, hemi ti hlawhtling tur hian Korea ram pahnihte hian kum 2 chhung zet an inbiak tawh loh hnuah tunah hian inbiakna an nei chho mek a ni.
Hetiang hi thil awmdan anih mek laiin Japan Foreign Minister Kono chuan ram hrang hrangte chu an ram venhimna thlah dul lo turin a ràwn a, North Korea inhawnna chu Nuclear Missile a tih changtlun zel theihna tura hun neih belh tumna mai anih a rin thu a sawi.
US pawhin hei hi thlawpin, Secretary of State Rex Tillerson chuan North Korea chuan inbiakna awmze nei a pawm ngei theihna tura nawr zel a tul a ni a ti a, South Kore Foreign Minister Kang Kyung-wha pawhin North Korea in inbiak a duh tak chhan chu ram hrang hrangte hrekna rah chhuah ni ngei a hriat thu a sawi ve bawk.