JNU-a Mizo zirlaite’n Chakma-te avanga Mizorama buaina thleng mek chin fel dan ngaihtuah turin ngen

0
363
views

New Delhi, Jawaharlal Nehru University-a Mizo zirlaiten vawiin khan PM, Narendra Modi-a hnenah, dan lova Bangladesh atanga lo lut, Chakma-te avanga Mizorama buaina thleng mek chin fel dan ngaihtuah tura ngenna an thehlut. PM hnena an lehkha thehluhah hian Mizo zirlaite chuan, Mizote chu hnam tlem an nih avangin hnam lian zawkten an chim ral loh nan ram danpui, Article 371-G hnuaiah humhalh bik an ni a, hemi avang hian hnam dangte nen pawh harsatna tawk lovin an awm thin niin an sawi a, tun hnaiah dan lova Mizorama lo lutten harsatna an siam tak zeuh zeuh avangin Mizoram leh hnam humhim turin sorkar laipui leh state Sorkar-in mawhphurhna lian tak an nei tih an sawi a ni. Mizoramah dan lova Chakma leh hnam dang an lut thin nia lang chu awmze neia khuahkhirh a nih loh chuan harsatna tam zawk a thlen phah thei a, hemi ching fel tur hian state sorkar-in a tih tur a tih tawk loh bakah sorkar laipuiin ram dang atanga lo lutte khuahkhirhna dan mumal a nei lo nia sawiin, JNU-a Mizo zirlaite chuan, sorkar laipui leh state sorkar chu hemi atana a tih tur ti thuai tura an phut thu an sawi a ni. Mizorama Chakma awmte pun dan chu mihring inthlahchhawn phung pangngai piah lam nia a lan avangin Mizote tan harsatna a thleng mek nia sawiin JNU-a Mizo zirlaite chuan, Chakma-te khuahkhirh tura nasa zawka tan lak a pawimawh thu leh tun hnaia Parliament-a pharh mai tur nia lang, Citizenship (Amendment) Bill, 2016 chu hnam tenau zawkte tana him lo thei tur nia an hriat avanga an pawm theih loh thu leh he dan hnuaia ram dang atanga dan lova lo lutte chu India khua leh tui nihna pek tumna awm chu ram danpui Article 14-na kalh nia a lan avangin tihhlawhtlin loh an duh thu pawh an lehkhaah chuan an sawi bawk.