Karnataka-a Congress leh JDS \angdun sorkar, MLA 18 in an bansan avanga tlu mai thei dinhmuna ding mek chu Supreme Court thupek angin Thawhlehni thleng chu a ngaiin a kal rih dawn.

0
82
views

Chief Minister HD Kumaraswamy kaihhruai Congress leh JDS \angdun sorkar chungthu hi Chief Justice Ranjan Gogoi-a kaihhruai Bench chuan Thawhlehni-a ngaihtuah nawn leh turin a ti a, an awmdan ngaia awm rih turin Sorkar leh MLA bang ta te chu a ti a ni.

Supreme Court ah hian hemi chungchang hi vawiin khan darkar khat vel sawiho a ni a, MLA bangta te zinga court-a kal mi 10 te aiawha ding ukil leh Speaker KR Ramesh bakah Chief Minister HD Kumaraswamy te court ah hian an inlan a ni. Banna thehluttu MLA te hian an banna thehluh chu Speaker in a ngaihtuah duh lo nia sawiin, Supreme Court hi inrawlh turin an ngen a, Speaker erawh chuan heng MLA ten banna an thehluh lai hian office ah a awm lo tih sawiin, a awm loh chhan pawh Pathianni a nih vang leh tih tur pawimawh dang a lo neih avanga office a chhuahsan vang a ni a ti thung a, Supreme Court hian kar leh Thawhlehni-a ngaihtuah chhunzawm tura dahin, chumi hma chu an awm dan ngaia awm rih turin sorkar leh MLA bang ta te hi a ti a ni.

Hetihlai hian ni 11 awh tur Karnataka Assembly fur \hutkhawm chu \an a ni ve chiah bawk a, Chief Minister HD Kumaraswamy hian huai takin sorkar chu a dingtlang dawn tih a sawi a, BJP in sorkar rin tawk lohna motion an pulut anih pawhin hmachhawn turin an inpeih tih a sawi.

Congress chuan an MLA te chu Assembly Session ah kim taka kal tura hriattirin, kal lo an awm anih chuan anti-defection law hmangin an chungah hremna lek a nih tur thu an sawi a ni.

HD Kumaraswamy-a kaihhruai Karnataka \angrual sorkar, nikum May thlaa ding \an chauh hi MLA 18 in banna an thehluh avangin tlu mai thei dinhmunah a ding mek a, \angrual sorkarin MLA 118 a neih \hin chu 100 ah a tla thla dawn tihna a ni a, MLA te banna hi pawm a nih chuan Assembly-a Majority nei thei chin chu 113 ni tawh lovin 105 ah a tla thla dawn tihna a ni a, BJP chuan Member 105 chiah chiah nei mahse, independent member 2 thlawpna nen sorkar siam theihna khawp member an nei thei dawn tihna a ni.