Khawzawl Tourist Lodge sakna leh PIDDC Scheme hmanga hnathawhnaah eirukna a awm leh awm loh chhui chiang turin Mizoram Lokayukta-in Anti Corruption Bureau a hriattir.

0
563
views

Zonet thudawn danin, he hriattirna hi Mizoram Lokayukta chuan Khawzawl Darngawn Venga Pu PC Chuauhnuna’n Khawzawl Tourist Lodge leh PIDDC Scheme hmanga hnathawhnaa sum hman dik lo a awm nia hriaa chhui chiang tura a ngen anga tih a ni. Mizoram Lokayukta-a ngenna a thehluhah Pu PC Chuauhnuna chuan, PIDDC Scheme hmanga Khawzawl leh Mizoram hmun dang danga Tourist Lodge sak chu sum dawn a nih loh avanga tihtawp a nih hnuah khatih laia Congress kaihhruai sorkar Programme, NEDP sum Rs. nuai 304.08 hmanga chhunzawm tura tih a ni a. Khawzawl Tourist Lodge bik chu Rs. nuai 67.49 hmanga sak chhunzawm tura tih a nih laiin, sak chhunzawm a ni lo a. Hemi chungchangah hian thil dik tawk lo a awm ni ngeia a lan avangin Mizoram Lokayukta chu chhui chian sak turin a ngen a ni.

Heng thil dik lo nia sawi chungchang hi Mizoram Lokayukta chuan Mizoram Lokayukta Act, 2014-in thuneihna a pek angin enfiah a, chhui zui tlak a nih leh nih loh enchiang turin ACB chu a hriattir a. ACB chu ni 45 chhunga he thil hi chhui zui tlak a nih leh nih loh hriattir turin a ti a ni.