Tunthla ni 1-a Khawzawla Pu Joseph Lalthakima te chhungkaw luahlai in kang chu vawiin khan khawtlangin hnatlangin an sak that sak. ZONET thudawn danin Insak hnatlang hi Khawzawl hermon veng VC kaihhruaia neih a ni a, in hi a dung feet 24 leh avang feet 15 a zaua sak a ni. In sakna atan hian mi tlawmngai te thawhkhawm leh ram lam atanga mi tlawmngaite thing lakkhawm te hman a ni a, hei bakah a chung rangva leh perek chu Khawzawl hermon veng VC ten an tum a ni. Hnatlangah hian mi 256 an thawk chhuak a, Mizoram Mistiri Association, Khawzawl Branch te pawh a thlawnin an hmanrua te nen an thawk chhuak a, MNF Gen. Hqrs. Secretary Pu Ngurzamlova’n Rs 2000 a pe bawk. In sak hna hi vawiina an zawh hman loh avangin naktuk lamah an chhunzawm leh dawn a ni.
