Kim Jong-Un-a unaunu-in South Korea-a Winter Olympic Games Opening Ceremony chhim dawn

North Korea hruaitu Kim Jong-un unaunu, thil ti thei tak chuan Zirtawpni-a Winter Olympic Games Opening Ceremony South Korea-a neih tur chu a chhim ve dawn tih South Korea Sorkar chuan a sawi. Kim Yo-Jong hi Kim Jong-il fanu naupang ber a ni a, nikum lamah North Korea ram tana thutlukna pawimawh siamtu Politburo member atana lakluh a nih hnuah a dinhmun hi a pawimawh zual ta a ni. Winter Olympic Games hawnna ah hian ram pahnihte hi an inlan ve ve dawn a, North Korea a tel ve tur hi ram pahnihte inlaichinna ti \ha chho thei tura ngaih nimahse, mithiamte chuan hei hian North Korea in Nuclear ralthuam tih changtlun zel a tumnaah nghawng a neih an ring lo thung. US chuan North Korea hian Olympic hi thu dik lo vawrh darhna hun remchanga hman a tum niin a ngai a, hemi chhanglet tur haian Vice President Mike Pence chu Olympic hawnna inkhawma tel tur hian a tir dawn a ni. North Korea aiawha Winter Olyimpic-a tel tur, North Korea Sports Minister Kim Il-guk kaihhruai mi 280 te chuan vawiin hian South Korea hi an thleng tawh a, heng zingah hian 229 te chu infiammite au phurtu tur Cheerleader te an ni a, taekwondo entir tur mi 26, official 4 leh chanchinbumi 21 te pawh an tel a. Athletic lamah chuan North Korea hian infiammi 10 chauh a tir dawn a ni.