Hnam hnatlangah hian mi \hahnem tak an pungkhawm a, thuziakte kengin Kolasib Bawrhsap, Dr. Arun T. an duh loh thu leh a kaihhruaina hnuaiah inthlanna felfai neih theih an rin loh thu an tarlang a ni. Hnam hnatlang tihtawp a nih hma khan Mizoram sorkar tirhin Mizoram Kohhran Hruaitute Committee chuan Kolasib NGO Coordination Committee hruaitute hmu-in lungawilohna an lantir leh Bawrhsap nawr chhuah an tumna chu chawlhsan turin an ngen a, tun dinhmunah hetianga hmalakna hian harsatna leh buaina lian zawk a thlen theih thu te sawia chhunzawm zel lo tura an ngen hnuah NGO Coordination Committee chuan hnam hnatlang chu chawlhsan rih an remti ta a ni. MKHC aiawhtute hi MKHC Secretary, Rev. C. Lalrinsanga, Rev. C. Rosiama leh Rev. Dr. H. Vanlalauva te an ni. Hnam hnatlang neiha lungawilohna entirtute hian Bawrhsap Pisa kai tur leh hnathawktu dangte pisa kai tur an dang a, hemi chhung hian Kolasib-a sorkar office zawng zawng leh zirna in zawng zawng khar a ni a, College erawh chu exam-na neih a nih avangin ngaihnathiamna pek a ni. Bawrhsap pisa tuala mipui pungkhawm hian an Bawrhsap, Dr. Arun T. thil tihdan duh loh entirnan a lim an hal a ni.
Puan tawh angin Tripura Bru Camp-a awm zinga mi 218 te chu Kolasib Bawrhsap hian hearing nei lovin Mizoram Electoral Roll-ah a thun thar a, heng mite hming hi thla hlui, October ni 27 khan ERO Net-ah a lo upload daih tawh tih hmuhchhuah a ni a, heng mite hi Electoral Roll-a inthun diltu mi 1,000 vel hearing-a anmahni an inlan loh vanga AERO ten an lo hnawl tawh avangin Bawrhsap thil tihdan hi dan bawhchhiaa thil tih niin NGO Coordinatin Committee chuan a ngai a, a mawhphurtu Dr. Arun T. chu Kolasib chhuahsan turin an lo hrilh tawh a ni.
