Agriculture Minister, Pu KS Thanga’n vawiin khan Kolasib District-a Chemphai leh a chhehvela leilet siamtute hamthatna tura sorkar hmalakna te a hmunah a en. Minister hian North Chawnpui leh Phaidam zau, Agriculture Link Road laih pawh a tlawh a, he Agriculture Link Road, NEDP sum Rs.10,00,000/- senga laih hi Km 2-a thui a ni. Minister hi Agriculture Deptt. hotuten an tawiawm a, harsatna an tawh leh a sutkian dan tur te pawh an sawiho nghal a ni. Hemi hnu hian Agriculture Minister chuan Chemphaia KVK Agriculture farm a tlawh bawk a, KVK-a Senior Scientist Dr. Michelle C.Lallawmkimi chuan lo dawngsawngin an hnathawh dan te a hrilhfiah a, Minister chuan KVK chu sorkar laipui hnuaia awm ni mahse tha zawk leh chak zawka hna a thawh theih nan Mizoram sorkar chu a tulna apianga tanpui turin a inpeih reng tih a hrilh a ni. Minister zin hian Irrigation & Water Resources Department-in kuthnathawkte hman tur tui pekna tur, Lift Irrigation Project siam mek te leh tui chhekkhawlna te a tlawh bawk a ni. Chemphaia tui lakna, Lift Irrigation Project hi NABARD atanga sum hmuh Rs.1,74,30,000/- senga siam mek a ni a, ram hectare 70-a zauva leilet neitu chhungkaw 30-in an chhawr thei dawn a ni. Minister hi Agriculture Deptt. Officer te leh Irrigation & Water Resources Officer ten an tawiawm a ni.
