Kolasib District chhunga khaw hrang hrangah pawh pangang hi nasa takin a puang a, Kolasib District Agriculture Office-a thawkte chuan, pangang puanna hmun hrang hrang hi tlawh kualin loneituten harsatna an tawhte an enpui a, pangang laka thlai venhim dan zirtirin, pangang hmuhna hmun hrang hrangah te a thlawhin hlo kahna leh damdawi an sem a ni.

0
309
views

Kolasib District Agriculrure Officer, Pu J. Rothanga chuan, an District chhung hmun hrang hranga vaimim hmunte chu ngun takin an vil reng tih a sawi a, vawiin thleng khan he rannung vanga harsatna tawk hi Kawnpuiah chhungkaw 28, Thingdawlah chhungkaw 20, Tuichhuahen-ah chhungkaw 20, Bilkhawthlir leh Vairengteah chhungkaw 30 vel leh Zero Point ah chhungkaw 30 vel an awm tawh tih sawiin, he thil vanga harsatna thleng thei veng turin Department chuan chak takin hma a la a, he pangang hian vaimim zik laimu a eichhia a, a zik pui a chhiat tawh chuan vaimim kungin peng thar a chhuah thei tawh loh avangin hetianga pangang-in a beih tawhna thlawhhmaah chuan rang taka a chi thar thlak leh mai a tha ber tih a sawi a, pangangin a la khawih loh hmunah erawh chuan damdawi kah a \ha tih a sawi.

Agriculture Department hotute chuan, Fall Army Worm pangang-in thlai a eichhiat avanga harsatna thleng mek hi sut kian tumin hma an la tih an sawi a, rannung thahna atan hian hlo chi khat Chlorpyriphos an hmang tih sawiin he rannung thahna hlo hi kawl sa an nei nual tih an sawi a, hetiang pangang puanna hmun hria te chuan rang taka Department hotute hriattir turin mipuite an chah a ni.