Kolasib District-a Phaisen khaw rama Sai pathum awm, mi lo leh huan tichhe thintu nia sawi chu halpuah leh puak thei dang hmanga um chhuah tum an ni. ZONET zawhna chhangin Kolasib DFO, Pu Lalnunzira chuan a um chhuahna tur hmanruate hi la khawm turin Range Officer tirh a ni tawh niin a sawi a, hetihlai hian Cachar District DFO pawh helai hmuna Sai awm chungchang hi hriattir a ni tawh a, amaherawhchu, a mi tirh Range Officer-in an Office a tlawh ni-ah Cachar DFO leh Range Officer te an awm loh avangin thil thui tak a sawipui theih loh niin a sawi. Pu Lalnunzira chuan helai rama Sai awm nia sawite hi amahin a la finfiah loh thu leh Phaisen khaw mite thusawi chu dika a rin thu a sawi a, Phaisen khawtlang hruaituten an thiam dan ang anga umbo an dilna chu rem a tih loh thu leh Forest Deptt. mite hmalakna lo nghak tura a hrilh thu a sawi a, Cachar DFO-in Sai-in thlai a tihchhiat avanga zangnadawmna dil tura mipuite hnena thurawn a pek thuah Mizoram chhunga thil thlengah chuan Mizoram Forest Deptt.-in hma a lak theih thu a sawi. Puan tawh angin Phaisen khaw ramah hian tun hma deuh atang khan Sai pathum a awm thin a, zan lamah an che chhuak deuh ber a, an buh, thlai leh hmunphiah hmun nasa takin a tihchhiat sak tawh a ni.
