Kolkatta-a Nalanda Institute of Advanced Studies (NIAS) a zirlai tirh leh sum chingpen nia sawi chungchang chhuichian phutin vawiin khan MNF General Hqrs. Vigilance Committee in ACB ah FIR an thehlut. An FIR thehluhah chuan, nikum February ni 23 a Chief Minister in NIAS in Advocate General kaltlangin cheng nuai 42 Mizoram sorkarah an pek kir thu thuthar thehdarhtute hnena a sawi chu tunthlengin Sorkar sumbawmah a la lut lo niin an sawi a, hemi chungchang RIT hmanga an zawhna MBOCWWB in a chhannaah NIAS in Mizoram sorkarah pawisa an pek kir thu an hriat loh thu leh nikum November a Assembly a LESD&E Ministerin zawhna a chhannaah pawh NIAS in pawisa an la pek kir loh thu a sawi tih sawiin he thilah hian thil fel lo a awm ngei nia a an hriat thu sawiin, chhuichian tul an tih thu an sawi a, MBOCWWB fund chu Member te tan chauha hman tur a nih laia dik lo taka NIAS a zirlai tirhna atana hman a ni te, NIAS a zirlaite zir man Instalment a pek tura tih a nih laia thla hnih khat lek chhunga pek tlak vek a ni chu Mizoram sorkara mawhphurtute leh NIAS inkarah dik lo taka inthuruala thil tih a awm ngei nia a an hriat thu sawiin a mawhphurtute chu chhuichhuaka hremna pe turin an ngen a ni.
