Champhai District-a Chawngtlai khaw mi, West Phailenga KTP General Conference-a kal tur mi 4, Car-a chuangte chu tukin dar 4 vel khan Seling thlen hma, Sakeibangla bulah kawng thlang awihah an tlan liam a, motor khalhtu leh neitu ni bawk, K Lalhruaitluanga, kum 35 mi, Chawngtlai Venglai chu Thingsulthliah damdawi in panpui a nih laiin a hliam tuar lovin a thi. Bawngkawn Police Station atanga thu dawn danin a ruang hi Thingsulthliah damdawi ina Doctor-te endik tir a nih hnuah vui turin an khaw lam panpui a ni. He Motor, vanduaina tawkah hian mi 4 an chuanga, midang 2 pawh an hliam avangin damdawi in panpui a ni a, thih hlauhthawnawm erawh chu an ni lo nia thu dawn a ni a, vanneihthlak takin an zinga pakhat chu hliam lovin a awm a ni. He motor kawng thlanga tlan lian hi Metre 60 vel a luma, motor pawh a chhe nasa hle a ni. An chetsual nachhan hi hriat chian theih ni lo mahse motor khalhtu a muthlu palh a nih rin a ni.
