Kumin Chapchar Kut March ni 1 leh ni 2 chhunga neih tur atana inbuatsaihna chuan a vawrtawp a thleng chho mek a. Kut Organising Committee chuan ‘Sem sem dam dam, ei bil thi thi’ tih chu kumin Chapchar Kut thupui atan an thlang. Vawiin khan Chapchar Kut Organising Committee chu Co-Chairman, Art & Culture Minister Pu R. Romawia hovin a pisaah an thukhawm a. Kut hman dan tur chungchanga an hmalak tawhna leh hmalak mek te an thlir ho a. Chapchar Kut hi kum dang ang bawkin District khawpui tinah hman leh tur a ni a, a hmanna pui ber chu Aizawl Sipai Lammual-ah chuan ni hnih hman tur a ni ang. A ni khat niah Kut Pa atan Art & Culture Minister Pu R.Romawia leh Kut thlengtu atan Art & Culture Director Pu R.Hmingthanzuala te hman an ni dawn a. A ni hnih niah Kut Pa atan Myanmar Chin State Chief Minister Pu Sailai Lianluai chu sawm a ni a, Kut Thlengtu atan Kut Organising Committee Chairman, Chief Minister Pu Lal Thanhawla ruat a ni bawk. Kumin hian Kut chhungin ‘No Vehicle Zone’ siam tum a ni a, Kut hmang tura kalte tan parking fee chawi ngai lo turin free parking area siam a ni dawn bawk. Kut boruak siam thei turin flag leh t-shirt bakah langsar takin Mizo taka chei banner hmun hrang hrangah tar tum a ni a. Kut hapta chhung hian Mizo mipui a tam thei ang ber Mizo inthuama inthuam turin Organising Committee chuan a ngen a ni. Sorkar hnathawkte tan Mizo thuam hak ni siam a ni dawn bawk a. Chapchar Kut photo exhibition pawh Vanapa Hall-ah neih a ni leh dawn a. AR Lammual-a volleyball court ah handloom and handicraft exhibition leh ei leh in tui hnai tak tak ei theihna hmun food court te siam tum a ni a. Chapchar Kut ni hnih chhung hian Mizo zai leh lam chi hrang hrang te, Mizo rimawi tum leh costume parade te, chhawnghnawh, pawnto, Mizo infiamna chi hrang hrang te bakah band leh malzai ngaihnawm tak tak thlir leh ngaihthlak tur a awm dawn a ni.
