Kumina Mizoramin State Legislative Assembly Election a hmachhawn turah state inpuahchahna te rawn endik turin Election Commission of India hotuten karleh, thawhleh ni khian zan khat riakin Mizoram an rawn tlawh dawn.

Hemi chungchangah hian vawiin khan Chief Secretary Pu Arvind Ray chuan Chief Secretary’s Conference Hall-ah State Election Department, GAD,SAD, Governor’s Secretariat, Finance, Police leh I&PR Department hotute thil pawimawh a sawipui a, Chief Electoral Officer Pu SB Shashank chuan Mizoram tlawhtu turte hi Chief Election Commissioner Om Prakash Rawat leh Election Commissioner pahnih Sunil Arora leh Ashok Lavasa te bakah mipawimawh dangte an ni dawn tih a sawi. Ruahman lawk ang chuan ECI hotute hian karleh Thawhlehni khian Aizawl an rawn thleng ang a, Political Party aiawhte an kawm hmasa ber ang a, a dawtah inthlanna buatsaih tura inbuatsaihna kalpui dan Mizoram Chief Electoral Officer an sawipui ang. Heng bakah hian Police lam te, DC tin te leh inthlanna-a inhnamhnawih tur Dept hotu dangte pawh an titipui dawn a ni.