Lawngtlai Bualpui NG-ah chhungkaw luah lai in kang ral, bungrua chuh hman lo

0
499
views

Lawngtlai District-a Bualpui NG-ah tukin dar 2:30 vel khan Pu TC Lalhumhima chenna in Assam Type chu bungraw engmah chuh hman lovin a kangral vek. He kangmei chhuak avang hian thi leh hliam an awm lova, in neitute mut tui lai taka chhuak a nih avangin a hmu hmasatu a patea chuan he ina awmte hi a kai thova, an sa him nan tukverh atangin an tlan chhuak thei a ni. Kangmei chhuah hmasakna hmun hi an choka lam a ni a, electric kalsual vanga chhuak a nih rin a ni a, an chokaa gas bur 5 an dah te chu a puak vek a, VC, YLA leh mipuite chuan a theih ang angin kangmei chhuak hi an thelh nghal a, PHE Deptt. chuan Public point-a tui hawngin kang thelhna tur tui an pe a, in dang kangkai lovin an thelh mit thei a ni. Kangmei avanga bungrua leh thildang kang chhe zawng zawng hi cheng nuai 5 hu vel nia hriat a ni. In neitupa Pu TC Lalhumhima hi Sangau RD Block Office-a VLA hna thawk lai a ni. Bualpui NG-a YLA hruaitute chuan kangmei tuartu chhungkaw tanpui dan tur tukin vek khan an ngaihtuah a, tanpuina khawn an tum bakah Sangau SDO Civil BDO ni bawk Pu Lalneihthanga pawhin a hmunah a tlawh a, in kang bang senghawitute thingpui in nan Rs.2,000/- a pe a, MDC leh mipui pawimawh dang bakah tlawmngai pawl hrang hrang, kohhran leh mimal te pawhin tanpuina tangkafaiin an pe a ni.