Lawngtlai-Diltlang-Parva kawnga Kurung lui kanna RCC lei Larsap Lt. Gen. Nirbhay Sharma a’n a hawng

0
450
views

Lawngtlai-Diltlang-Parva kawnga Kurung lui kanna RCC lei Border Road Organization-in a dawh chu vawiin khan Larsap Lt. Gen. Nirbhay Sharma a’n a hawng. He lei hi meter 72.50-a sei, Rs. 7,36,00,000/- senga dawh a ni. Hawnna inkhawma thu sawiin Larsap chuan Border Road Organization hnuaia Project Pushpak hian kum 1963-a Mizorama an awm atangin kawng km 3,600-a thui an siam tawh niin a sawi a, hmun hrang hranga lei an dawh pawh a sei zawng belhkhawm chu meter 2,200 a tling niin a sawi a, Mizorama nasa zawka Border Road Organization-in hna a thawh nan sum tam zawk pe turin amah leh Chief Minister, Pu Lal Thanhawla pawhin Ministry of Defence an ngen tawh niin a sawi a ni. He inkhawmah hian Project Pushpak Chief Engineer, Brig. Birender Singh leh 24 BRTF Commander, Pu SK Choubey te pawhin thu an sawi a ni. Lei dawhna hmun Larsapin a thlen hian Khawmawi khaw mipui leh School naupangten an lo hmuak a, lei hawnna inkhawmah cheraw an entir a ni. Lei hawn hnu hian Larsap hian Helicopter-in Aizawl a pan lehnghal a ni. He inkhawmah hian Lawngtlai Bawrhsap, Dr Arun T., LADC EM, Pu C. Lalneihkhuma leh sawrkar officer te an tel a ni.