Lawngtlai District-a Sentetfiang-ah Chhawkhlei Kût hmang dawn

0
566
views

Lawngtlai District-a Phawngpui tlang tawntirha Sentetfiang khuaah tun thla ni 8, Ningani leh ni 9, Zirtawpniah te khian Chhawkhlei Kût hman a ni dawn. He Kut, Rhododendron Festival tia hriat bawk hi Lawngtlai Bawrhsap, Lai Autonomous District Council leh tlawmngai pawl hrang hrang tangrualte huaihawt a ni a, he Kut hawng tur hian Larsap, Lt. Gen. Nirbhay Sharma chu sawm a ni a, Helicopter-a a tumna turin Sangau Helipad pawh chei that a ni tawh a ni. He Chhawkhlei Kut hman dan tur programme kim chang hi tun hnai khan Lawngtlai Bawrhsap, Dr. Arun T. kaihhruaiin Organizing Committee-in a siam a, Sangau BDO leh Sangau Sub Hqrs. YLA chuan a hmun tur buatsaih hna an thawk mek a, Lai Autonomous District Council-a Art & Culture Deptt. pawhin programme leh he Kuta zaithiam leh lam thiam tel tur te a buaipui mek a, Chhawkhlei idol pawh thlan a ni ang. He Chhawkhlei Kut hi Phawngpui tlang mawina te, nungcha leh ramsa awm te bakah thing leh mau humhalhna atan te, zin veivak mi hip nan te a tangkai thei ang bera hman a ni ang. Kut chhung hian Department hrang hrangte chuan an hnathawha hlawhtlinna awm te mipui hmuh theih turin an phochhuak dawn a ni.