Lawngtlai District-ah Myanmar mi raltlan pung zel, mi 1,285 chhinchhiah tawh

0
477
views

Lawngtlai District-a Myanmar ramri depa Myanmar mi raltlan, Mizoram chhunga lo lut chu an pung zel a, vawiin thleng khan mi 1,285-in Mizoram an lo lut tawh a, hengte hi khaw 4-ah dah khawm mek an ni. Lawngtlai Police hotute hnen a\anga thu dawn danin an tam berna, Laitlangah chuan himna zawnga civil mi lo lut te hi 534 an tling tawh a, Zochachhuahah 401, Hmawngbuchhuahah 229, Dumzautlangah 121 an awm bawk a ni. Heng mite hi an chenna khua leh a chhehvela Myanmar sipai leh Rakhine state-a hel pawl, Arakan Army tia hriat te, nasa taka an inkah avanga himna zawnga tlanchhia an ni a, Lawngtlai Bawrhsap leh SP chuan he thil thleng hi Mizoram sorkar an hriattir tawh a, sorkar chuan a \ul dan ang angin a buaipui mek a, an awmna khaw hrang hranga VC te leh Police-te chuan a chhinchhiahna siamin heng mite hi an chhinchhiah vek a, an mamawh, ei tur leh awmna tur an ngaihtuahsak mek a ni. Lawngtlai Bawrhsap leh Food, Civil Supplies & Consumer Affairs Supply Department Director chu heng mite ei tur buhfai a thlawna pe tura hriattir an ni tawh a, a \ul chuan sorkar laipuiah hriattira, \anpuina dil a nih tur thu pawh Home Minister, Pu R. Lalzirliana’n a sawi a ni. Home Minister chuan heng mite hi Myanmar a\anga Bangladesh-a raltlan, Rohingya Muslim ni lovin, ramri depa awm, Zohnahthlak vek niin a sawi a, an awmna khaw hrang hrang VC-te chu heng mite lo mikhual turin a hrilh tih a sawi. Home Minister chuan Myanmar sipai nena tun hnaia an inkahnaa hliam, Arakan hel pawl mi 5 pawh Aizawlah enkawl mek niin a sawi bawk.